Esta semana dimos unha volta polo concello de Carnota para visitas un dos accidentes xeográficos naturais que máis gustan ao que escribe. As fervenzas de Pedrafigueira son un conxunto de caídas de auga, cada unha máis fermosa que a anterior. Unha vez se chega ata o lugar das fervenzas o camiño invita a seguir subindo e cada caída que se supera unha cascada máis fermosa agarda no piso de arriba.

O lugar, ben agachado a unha beira do Bico do Santo, esa montaña de rocha que se ergue no medio da chaira de Carnota cunha cruz no curuto, atópase rodeado de carballos e fieitos, que nesta época ofrecen unhas cores preciosas, entre ocres e amarelos ao gusto do consumidor.

Como chegar

Se partimos de Cee e tiramos pola estrada da Costa cara o sur, entramos no concello de Carnota ata chegar a Pedrafigueira, onde hai que coller un cruce á esquerda logo dun zigzag bastante pechado. Collemos a estrada e xusto antes de chegar ao pavillón collemos unha pista asfaltada á dereita, deixando un pequeno edificio da cooperativa á esquerda e o colexio á dereita. Tiramos pola pista cara arriba, pasamos un roteiro á esquerda que sobe ata o Bico do Santo, ata chegar a unha explanada onde habemos aparcalo coche.

A pista de terra comeza entón nunha pontiña por onde pasa un regato por debaixo. Subimos e subimos un quilómetro, quilómetro e medio e ao dar un par de curvas seguidas, chega unha á dereita dende onde se ve por primeira vez o Bico do Santo e o monte Pindo. Aí xusto, e deixándonos guiar polo oído, cae cara á esquerda un caminiño en condicións regulares, que baixa ata as fervenzas.

Topamos cunhas caídas, preciosas, sacamos unhas fotiños, pero coma o caminiño comeza a subir agora, seguímolo, pasamos unha construción de pedra de debía ser un muíño, e un pouco máis arriba está a de maior altura. Entre 10 e 15 metros de caída que impresionan. Pero a cousa non remata aquí. Seguimos subindo e as caídas sucédense en diversas formas e alturas. Unha máis baixiñas onde o auga esvara polo berce de granito, e outras que invitan a sentar embaixo para tomar unha masaxe, mágoa que non esteamos no tempo.

Novas relacionadas

• Outros recunchos da Costa.

Fonte

• Redacción.