|
Iso de ir mercar o abono e os fertilizantes químicos rematou. A meirande parte do rural galego xa fabrica o seu propio abono e que os labregos ben aproveitan a fermentación dos residuos orgánicos para crear compós natural. Pero iso de botarlle un pouco do fertilisante ese que vende na tenda é moi típico tamén. Pois a Consellería de Medio Ambiente inicia un programa co gallo de facilitar este proceso e ofrece achegar, por medio de Sogama, un composteiro para cada vivenda que o solicite. Cabe lembrar que a materia orgánica representa en torno ao 50-60% da composición media do lixo xerado no noso país. O programa está na fase de iniciación, e tan só os concellos colindantes ás instalacións da Sociedade Galega de Medio Ambiente (Sogama), situada en Cerceda, xa contan con este servicio. Estes concellos son Ordes, Cerceda e Carballo. Foron varios concellos ouresáns (O Carballiño, Carballeda de Avia, Piñor e Ribadavia) os que participaron no programa piloto. Os concellos teñen que pedir solicitude, ou cando menos enviar unha mostra de interese a Medio Ambiente para que a consellería o tome en conta. Deste xeito instamos aos concellos da bisbarra a que soliciten a implatación do programa para mostrar o interese da Costa da Morte neste proxecto e para que participemos nós na segunda xeira da iniciativa. Instalación do composteiro O dosier que presenta Sogama na súa web no apartado "Programa piloto de compostaxe caseira" explica detalladamente os pasos para instalar na propia leira o pequeno composteiro. Aquí detallamos un adianto do dosier. ¿Que é o compost? O compost, como produto da compostaxe, é un material estable, hixiénico e semellante ao humus do bosque que se pode empregar como abono natural, en sustitución dos fertilizantes químicos. Apórtase á terra para mellorar as súas propiedades. Agregar compost ao chan considérase a forma natural de fertilizalo e reconstruir a súa calidade. A compostaxe pode facerse nunha ampla pila de residuos, máis polo xeral resulta práctico empregar un composteiro. ¿QUE NECESITAMOS PARA FACER COMPOST? - Un espazo axeitado no xardín ou na horta.
- Un composteiro.
- Unha forca, pala ou outra ferramenta para voltear.
- Auga.
- Residuos de cociña (restos de froita, verdura, pousos de café, té, pó da aspiradora, etc).
- Residuos vexetais do xardín (restos de poda, ramiñas, follas secas, céspede, restos de flores, etc).
O COMPOSTEIRO O composteiro é un recipiente onde se bota a materia orgánica para a súa transformación en compost. Os composteiros facilitan a aireación e o control da temperatura e humidade, evitando a dispersión do lixo e repelendo a roedores e outros insectos. Outra das súas avantaxes é que permite voltear moi fácilmente a pila empregando un removedor. ¿ONDE INSTALAR O COMPOSTEIRO? A localización máis axeitada será nun lugar sombreado, de fácil acceso e cunha boa drenaxe, pois o material ha de manterse quente, húmido e osixenado. O composteiro é preferíbel colocalo directamente sobre o chan e non sobre cemento, para permitir o paso aos organismos encargados de degradar o material orgánico (bacterias, fungos, miñocas, etc.). Sería de interese poñer primeiro sobre o terreo ramas e restos de poda ou toxos picados. Novas relacionadas Fonte e máis información
|
Semente RSS