O pasado 7 de febreiro acudía a Baio o presidente da Deputación Provincial de A Coruña, Salvador Fernández Moreda, para inaugurar o novo paseo fluvial da vila xunto co alcalde de Zas, Manuel Muíño Espasandín. O presidente do ente provincial salientou o compromiso desta institución coa recuperación e posta en valor do patrimonio natural da provincia, segundo manifestou no acto de inauguración, no que participaron tamén o primeiro o vicepresidente provincial, Pablo Villamar; os deputados Carmen Borbujo e Xoán Manuel Sande; o concelleiro do BNG de Vimianzo, Manuel Antelo; e un numeroso grupo de veciños da zona.

Os habitantes de Baio dispoñen dende a semana pasada dun novo espazo para o lecer, e trátase dun paseo fluvial que discorre paralelo ao río Grande, cunha lonxitude aproximada de 230 metros. A recuperación ambiental e paisaxística deste contorno natural fíxose grazas ao proxecto desenvolvido pola Deputación da Coruña, a través do Programa Operativo Local, cun investimento total de 421.000 euros.

Esta intervención contemplou tamén a execución dun carril-bici, cun largo de tres metros, así como a instalación do alumeado, ademais de diverso equipamento de mobiliario urbano. Tras o descubrimento dun monolito de pedra que lembra a apertura do novo paseo fluvial por parte de Fernández Moreda e de Manuel Muíño, este agradeceulle á Deputación da Coruña a execución do proxecto, e salientou tamén o compromiso do goberno local para “a recuperación do noso patrimonio, e para poñer en valor a nosa paisaxe”. Manuel Muíño solicitou o apoio económico da institución provincial para prolongar o actual paseo. Pola súa parte, Fernández Moreda referiuse á recuperación “dun espazo natural para o uso e gozo dos cidadáns”, e valorou a execución do proxecto.

Dotación de servizos

O proxecto contemplou as obras necesarias para a recuperación ambiental e transformación da zona da ribeira do Río Grande, mediante a creación do paseo fluvial, relanzando a zona como espazo de lecer e de gozo para tódolos habitantes da zona, ademais dos turistas que visiten o lugar.

O paseo fluvial está formado por un respaldo de protección do arborado da ribeira do río, un paseo peonil de dous metros de ancho, carril-bici de tres metros e zona verde que sirve de separación entre paseo e carril-bici.

Dotouse dos servizos de abastecemento de auga, rego, alumeado, e recollida de augas pluviais mediante gabia de lastro. Realizáronse dúas pasarelas peonís de madeira de piñeiro vermello para unir a illa existente. A iluminación do paseo peonil fíxose mediante columnas de 6 metros de alto de aceiro galvanizado, brazo de un metro e luminaria con lámpada de 100 watios. Dentro do mobiliario urbano inclúense bancos de madeira e de pedra de granito, así como papeleiras e fonte de fundición. Na zona da illa e no comezo do tramo colocouse unha varanda de madeira.

Novas relacionadas

• O Concello de Carballo aproba o carril-bici ata Razo.

Fonte

• Nova cedida polo semanario O Acontecer.
• Fotografía de Marcos Rodríguez.