Chega unha iniciativa conxunta, un proxecto colectivo que pode traer unidade e cohesión para unha bisbarra cunha realidae social e laboral ben complicada. O Pacto Territorial de Emprego da Costa da Morte chega coa ilusión de axudar a crear unha rede global que axude a fixar a poboación, sobre todo a nova, que cada ano ten que emigrar á cidade para se desenvolver como traballador.

Onte, martes 19 de febreiro de 2008, firmábase o acta fundacional da asociación, pero dos 18 concellos que nun primeiro momento mostraran o seu interese, tan só 13 estaban presentes. E con todo, dos 13, nin Carnota, nin Fisterra, nin Corcubión puideron rubricar o Pacto, por non teren adoptado o acordo plenario os dous primeiros, e porque o concelleiro que acodía de Corcubión non tiña poder para rubricalo.

Contra Carballo

A semana pasada Ramon Vigo, alcalde de Cee, mostraba a súa disconformidade fronte a presencia de Carballo no Pacto, por corresponder a realidades socioeconómicas radicalmente distintas. E non lle falta razón, con todo.

O alcalde de Vimianzo lidera tamén o movemento contra a inclusión Carballo e A Laracha, secundada tamén por Laxe e Dumbría. Pola súa parte, o alcalde de Cabana non acodíu por outros motivos, por ter outra reunión prevista con anterioridade, de feito que é probable que remate firmando o Pacto.

Sindicatos

Do mesmo xeito que os concellos, os sindicatos tampouco están a darlle un valor claro ao Pacto. Tan só un dos 3 máis importantes, Comisións Obreiras, comparecíu. Así pouco imos facer.

Novas relacionadas

• Falamos con Ramón Vigo sobre a presencia de Carballo nos plans que atinxen á Costa da Morte.
• "O servizo Laxe Emprego pretende ser unha referencia para demandantes e ofertantes”.

Fonte

• La Voz de Galicia: Cuatro concellos se descuelgan del Pacto Territorial para o Emprego.