Unha importante delegación de cabaneses, comandada polo alcalde, José Muíño, e na que tamén ía o seu homólogo de Coristanco, Antonio Pensado, viaxou entre os pasados días 27 e 30 de marzo á localidade francesa de Treize-Septiers. Alí certificouse a irmandade de ambos municipios. Produciuse nunha cerimonia oficial celebrada na mañá do sábado 29, coa sinatura e a lectura en voz alta dun representante de cada delegación nos tres idiomas oficias: galego, castelán e francés.

A saída fíxose o xoves 27 ás 18:00 horas. Ceouse en Valencia de Don Juan (León) e proseguiuse a viaxe en autocar ata Francia. Entre o venres e o domingo houbo tempo para que os integrantes do grupo cabanés e os habitantes de Treize-Septiers estreitaran os lazos que xa os unían. Visitáronse varios museos, comeuse en Rocheserviére, celebráronse varias ceas e almorzos coas familias de acollida, entregouse un premio literario e participouse na feria.

Viaxe anterior dos franceses á Costa

Esta viaxe devolve á feita ao remate do pasado ano por unha delegación da propia localidade francesa de Treize-Séptiers, que pasou uns días de convivencia e intercambio cultural froito do irmanamento entre as dúas localidades. Foi un programa de actividades culturais, turísticas e medioambientais, sen deixar de lado aspectos coma a gastronomía, o folclore ou o intercambio de experiencias.

Fonte

• Nova cedida polo semanario O Acontecer.
• Fotografía de Marcos Rodríguez.
• Concello de Cabana.