|
 A incursión de Marcos Rodríguez no fotoxornalismo é relativamente recente. Nembargantes, o seu idilio coas cámaras ven de lonxe. O xefe de fotografía deste xornal leva encadrando, ‘disparando’ e -como se facía outrora- positivando dende que ten uso de razón. “Sempre me chamou a atención a maneira na que coa fotografía se pode captar un momento. Creo que isto axuda a non esquecer o que che pasa. Xa de moi pequeno tiven posibilidade de manexar unha cámara e meu pai ensinoume moito neses primeiros momentos”, di. As mellores imaxes que captou na Costa da Morte estarán expostas na Sala de Exposicións do Centro Cívico e Cultural de Artexio dende o 18 de abril, con horario de 10:30 a 14:00 horas e de 16:30 a 22:00 horas.
“Unha Kodak Retina do 54, regalo do cónsul xaponés en Milán a seu pai, e que levaba na súa casa toda a vida”. Esta foi a primeira cámara de Marcos Rodríguez, segundo sinala na súa web. Coa axuda de seu pai comezou a buscar as mellores opcións que lle ofrecía a realidade cotiá para ‘metelas’ nos seus carretes. “Chamoume moito a atención dende un principio a natureza. Antes traballaba moito en branco e negro. Ademais, tiven a sorte de que me prestaran o laboratorio do Centro Cultural de Carballo para pasar alí tardes revelando negativos de 35 milímetros. Despois xurdiu a posibilidade de facer un curso de produción audiovisual, alá polo 93, e aí engancheime definitivamente”, engade. Pasou tempo coa fotografía como ‘hobby’, aínda que sempre presente mentres traballaba noutras cousas. Tentaba combinar a súa afección coas tarefas para subsistir. Só hai dous anos que se decidiu a probar sorte nos medios de comunicación. Empezou en ‘El Ideal Gallego’, onde segue colaborando, e agora está integrado na singradura de O Acontecer. Neste tempo tomou unhas cantas imaxes belas da Costa da Morte, as que agora expón en Arteixo. Por que a Costa da Luz? “Porque hai boa luz dende calquera punto desta comarca. Estamos completamente rodeados de mar e iso axuda a que o sol sexa especial. Podes poñerte a mirar ao Monte Pindo dende Corcubión e ver unha paisaxe espectacular. E podes facer o mesmo dende moitos outros puntos da Costa. Hai unha luz moi boa e eu tenteina aproveitar o máximo posible. É difícil, porque se sacas durante unha hora unha foto cada minuto, 59 delas serán malas ou regulares e só unha realmente boa. O 70% dunha gran foto conséguese estando no lugar correcto no momento exacto”, explica. A Marcos Rodríguez resúltalle complicado elixir as súas fotos favoritas: “Cada día teño como preferida unha foto distinta. Igual dentro de seis meses teño un montón que me gustaron no seu día e nese momento xa non. O meu criterio pode ser moi diferente do de outras persoas. É a xente quen decide ao final cales son as mellores”. FASGANA (a Asociación Galega de Fotógrafos da Natureza) é outro dos proxectos nos que está embarcado Marcos Rodríguez. É socio fundador e parte activa do colectivo, ademais de vocal para a Costa da Morte. Recentemente el e os seus compañeiros celebraron o II Rally Fotográfico da Costada Morte por distintos puntos da zona. Para el hai un gran referente na fotografía de paisaxes naturais: “Ansel Adams é a influenza principal, sen dúbida. Non tentamos copiarlle, pero sempre está presente cando tomamos este tipo de imaxes”. A pesar de admitir que a súa afección medrou cando empezou a revelar negativos no laboratorio, Marcos Rodríguez non é un romántico das cámaras analóxicas. “Non creo que se perdera nada coa tecnoloxía dixital. Nada en absoluto. Hai que aproveitar o que se mellorou, porque nos ofrece un mundo novo. Perdéronse cousas no camiño, mais a dixitalización abriunos moitas posibilidades”, argumenta. Polo de pronto, dende o veners 18 de abril de 2008, poden pasar pola Sala de Exposicións do Centro Cívico e Cultural de Artexio para disfrutar da "Costa da Luz". Novas relacionadas Fonte
|
Semente RSS