Os problemas co 3º convenio colectivo da empresa norueguesa de acuicultura Stolt Sea Farm segue a dar que falar. Os 201 traballadores da empresa (162 nas 4 plantas da bisbarra, Lira (64), Merexo (35), Quilmas (34) e cabo Vilán (29), mentres que o resto non teñen un encadre fixo), axudados pola CIG, continúan coa loita pola formalización dun convenio que, cando menos, non reduza as condicións laborais que conseguiran co 2º convenio. A pugna está centrada, sobre todo, en dous puntos: a antigüidade e os ascensos relacionacionados coa propia antigüidade..

A negociación xa leva 1 ano e 5 meses, nos que a empresa non sae da súa actitude intransixente tentando recortar os dereitos dos traballadores. Entrementres, os soldos dos trablladores están conxelados dende o 2006. Segundo sinala a CIG, a empresa segue a embolsarse beneficions millonarios (máis de 11 millóns de euros no 2006 e preto de 15 no 2007 pendentes de confirmar). Ademais, as primas só as cobran os directivos., mentres os traballadores perden poder adquisitivo.

Pasado e presente

A política laboral da empresa norueguesa era exemplar ata hai 3 ou 4 anos, como nos conta Xabier Santos, da CIG. Nos primeiros anos os incrementos salariais chegaban ao 7 e o 8% por riba do IPC, pero dende hai un tempo e, tras un cambio de rumbo, comezaron os recortes e as presións en todas as fábricas. Sobre todo nos departamentos denominados Hatchery, ou criadoiros, nos que se contabilizan 11 dos 18 despidos nos útimos 4 anos, dos que tan só un foi a xuizo.

Precisamente o único xuizo deu a razón ao traballador, que curiosamente era o presidente do comité de empresa, Joaquín Casais, quen tivo que ser readmitido aló por xaneiro, por despido improcedente. Isto dá boa conta da política de laboral represiva.

Presión laboral

Se o traballo en si en cada piscifactoría non mata a ninguén, o que se cadra fai dano é o continuo acoso e as cartas de apercibimento por suposto baixo rendemento que provocan un estrés laboral nos traballadores. Mesmo hai xa a día de hoxe dúas baixas por ansiedade e unha incapacidade total por depresión, e hai moitos traballadores que solicitan a baixa voluntaria ou deciden non renovar os seus contratos. Ademais, disque xa hai un despido preparado para esta semana.

A CIG califica de vergoñenta a política laboral da empresa, que leva anos aproveitándose das subvencións tanto da U.E. como da Xunta a través das consellerías e Medio Ambiente, Política Territorial, Industruia e Pesca, pero que non traballa ao servizo do desenvolvemento económico e social das zonas onde se asenta, senón para o enriquecemento do grupo e dos seus directivos, como sinalan dende a CIG.

Campaña informativa

Con todos estes problemas dende o sindicato dan comezo a unha campaña de contactos e información coas distintas administracións, para pór en coñecemento das mesmas a política laboral que nestes Centros de Traballo da empresa Stolt Sea Farm S.A. se está a dar.

Manifestacións

Os traballadores da empresa afiliados á Confederación Sindical Galega, participaban o primeiro de maio nunha manifestación na Coruña co gallo do día do traballador, na que participaron unhas 2.000 persoas baixo o lema "por un modelo socioeconómico xusto e sustentábel". Na cidade herculina houbo outra manifestación convocada por CCOO e UGT, na que participaron outras 2.000 persoas aproximadamente.

Nota de prensa da CIG

Os Traballadores de STOLT SEA FARM afiliados a esta Central Sindical veñen de participar na manifestación convocada pola CIG que se celebrou o xoves na Coruña con motivo do 1º de Maio e co lema “por un modelo socioeconómico, xusto e sustentábel”.

Os traballadores/as reivindican a negociación do convenio colectivo de empresa, negociación que dura xa un ano e cinco meses. A empresa segue cunha aptitude intransixente coa única pretensión de recortar os dereitos xa adquiridos no actual convenio, chantaxeando os traballadores cun negociación que se fai interminábel e que ten como consecuenca que os traballadores/as teñan conxelados os salarios dende o ano 2006.

A pesar diso a empresa segue a embolsarse beneficios millonarios (máis de 11 millóns no 2006 e preto de 15 no 2007 pendentes de datos oficiais que a empresa aínda non entregou o comité) o mesmo tempo os seus directivos sí se reparten as primas a final de ano, mentres os traballadores/as perden poder adquisitivo.

A empresa, pola contra, segue unha política laboral represiva, de acoso continuo nalgúns dos seus departamentos, continuas cartas de apercibimento os traballadores, estrés laboral … (cuestións que esta Central Sindical xa trasladou a asesoria xurídica para estudar as posíbeis demandas contra algúns directivos por acoso laboral), e un nº de despedimentos intolerábel e sen precedentes en ningunha empresa desta comarca (18 nos últimos 4 anos). Unha política laboral que leva a que algúns traballadores decidan non renovar os seus contratos ou a solicitar a baixa voluntaria.

E inadmisíbel cunha empresa que ven percibindo importantes cantidades económicas tanto da U.E. como da Xunta de Galiza a través das correspondentes Consellerias, Política Territorial, Medio Ambiente, Pesca e Insdustria, incluso dos Concellos, facilitándolle no seu día a adquisición de terreos onde están asentados os seus 6 centros de traballo; e que debería servir para o desenvolvemento económico e social das zonas onde se asenta; serva para o enriquecimento do grupo, dos seus Directivos e practique nos últimos anos unha política laboral tan vergoñenta.

Por este motivo a CIG iniciará unha campaña de contactos e información coas distintas Administracións, para pór en coñecemento das mesmas a política laboral que nestes Centros de Traballo da Empresa STOLT SEA FARM, S.A. se está a dar.

Novas relacionadas

• Stolt Sea Farm terá que readmitir a un traballador de Quilmas que fora despedido.

Fonte

• Redacción.
• Nota de prensa da CIG, redactada por Xabier Santos.