Marisol Soneira, non se corta un pelo, e esta pasada semana realizaba unhas manifestacións sen desperdicio. A Secretaria Xeral do PSdeG-PSOE da Costa Atlántica manifestou que “resulta patético o esforzo que fai o PP por desacreditar o compromiso do Goberno galego e do Presidente Touriño coa Costa da Morte”.

A deputada socialista recorda que “onde antes só había liñas nun papel agora hai orzamentos xa licitados e publicados no DOG, onde antes só había promesas forzadas ante un dos maiores desastres ecolóxicos da historia agora hai un plan integrador e consensuado, con investimentos. Por exemplo: a Costa da Morte contará por vez primeira na historia cunha autovía de catro carrís libre de peaxe entre Carballo e Berdoias; por vez primeira na historia a Costa da Morte contará cun porto comercial que se localizará en Brens, e que permitirá o atraque de barcos de ata 30.000 toneladas”.

Soneira aseverou que “polo demais este Goberno foi quen de desbloquear a única proposta real do PP despois do Prestige: o Parador de Turismo de Muxía. A estas iniciativas hai que unir outras relcionadas co emprego, co medio ambiente, coa depuración das augas, con numerosas obras no litoral; moitas delas licitadas e outras xa realizadas por un importe cercano aos 600 millóns de euros”.

Por último Marisol Soneira lémbralle ao PPdeG que “se hai unha zona do país desamparada, abandonada e olvidada polos poderes públicos durante os 16 anos dos gobernos do PP en Galicia, esa é a Costa da Morte. Só deixaron emigración e despoblación”.

Fonte

• Nota de prensa do Gabinete de Comunicación do PSdG-PSOE.