O deputado responsable da área de Benestar Social, Políticas de Igualdade de Xénero e Normalización Lingüística da Deputación da Coruña, Xoán Manuel Sande, visitou o martes as instalacións de Íntegro, a Asociación para a Diversidade Funcional das comarcas de Bergantiños, Terra de Soneira e Fisterra situada en Cabana. Durante o percorrido polo centro de recursos, Sande comprometeuse a que a institución provincial apoiará a Íntegro con diversas subvencións.

Sande explicou que coa visita ás instalacións de Íntegro “devolvía á deferencia que tivo o presidente da entidade Adolfo López Baña cando acodeu a unha xuntanza na Deputación”. Presenciou as actividades ocupacionais, de manualidades e informáticas que teñen lugar en Íntegro e recibiu as peticións de López Baña, para “amañar o tellado, mellorar o transporte adaptado e renovar a furgoneta”.

Para o deputado provincial, Íntegro cumpre un papel importante “cubrindo as carencias coas que se enfrontan os discapacitados diariamente, especialmente no rural, como neste caso”. Destacou o seu traballo “en inserción laboral” e o seu esforzo por vertebrar “un territorio tan disperso como é a Costa da Morte”.

López Baña agradeceu a visita, valorou a importancia da implicación “dun político da bisbarra” e expresou os seus desexos.

Máis información

• Asociación para a Diversidade Funcional das comarcas de Bergantiños, Terra de Soneira e Fisterra Íntegro.

Fonte

• Nova cedida polo semanario O Acontecer, e redactada por Luis Soto.
• Fotografía de Marcos Rodríguez.