|
O Valedor do Pobo respostaba a demanda que o grupo ecoloxista PX da Ponte do Porto realizaba aló por novembro do pasado 2007, co gallo de depurar responsabilidades no tocante á desfeita do encoro da Fervenza, ocorrida nese mesmo mes, e onde morrían varios milleiros de peixes ante a nula actuación da empresa concesionaria, Ferroatlántica, e Augas de Galicia. Ambos entes, a través de 2 altos cargos cargos de cada un, están sendo analizados pola xustiza ordinaria, polo que o Valedor do Pobo anunciou que peche do expediente pola denuncia realizada pola entidade ecoloxista. Valoración positiva O grupo PX valora o detallado informe presentado polo Valedor e estima que a resolución é lóxica ao estar aberto un proceso penal, así como un expediente administrativo, que desde o grupo desexan que finalicen pronto. Falta agora a resposta da Unión Europea, que así mesmo abriu un expediente pola súa denuncia, e mesmo solicitaba información hai un par de meses. Completo informe O Valedor enviou un completo informe incluido un dossier histórico sobre a concesión do Xallas. Neste indícase que o aproveitamento hidroeléctrico é unha concesión de 1958, que obriga á empresa ás disposicións da Lei de Pesca Fluvial, lei que prohibe a realización de obras sen autorización previa e indica que todos os danos e prexuízos que se produzan de calquera clase serán por conta do concesionario. Bastante clariño. Culpa da empresa Segundo PX, e tras estudiar a información recibida, e agardando a resposta da xustiza, considera culpable á empresa concesionaria por dous motivos fundamentalemente. Segundo informa Augas de Galicia, o 9 de novembro de 2007, 3 días antes da matanza, realizaba unha visita de inspección, na que constataba que as reservas hidráulicas do encoro eran case inexistentes, estando a verter, non obstante, o concesionario neses días un caudal ecolóxico moi superior ao mínimo imposto. Ademais, Augas de Galicia comprobaba como a empresa realizaba obras de reparación e mantemento sen dar cumprimento aos requisitos establecidos pola concesión, isto é , sen dar conta. Así e todo, por que non denunciou os feitos a Xunta nese momento? Entrementres, o encoro segue recuperando vagariño un estado aceptable. O último boletín hidrolóxico cifra a ocupación da fervenza nun 63,16%, mentres que o de Santa Uxía do Ézaro ronda o 98%. Como non, se este é o que se usa para a explotación hidroeléctrica. Non cansaremos de pedir que mentres non nos devolvan a fervenza do Ézaro, polo menos, que camuflen un popuco os terroríficos tubos que baixan polo granito abaixo, desvirtuando unha imaxe que podería percorrer o mundo enteiro pola súa fermosura. Nota de prensa do PX O Valedor pecha o expediente pola desfeita da Fervenza A oficina do Valedor do Pobo comunicou ao grupo ecoloxista PX da Ponte do Porto o peche do expediente pola denuncia presentada por esta entidade en relación á mortalidade de peixes ocorrida no aproveitamento hidroeléctrico da Fervenza, en Dumbría, no río Xallas. O Valedor xustifica esta decisión porque Augas de Galicia incoou un expediente sancionador contra a concesionaria Ferroatlántica para determinar a existencia de infracción administrativa por posible incumprimento das responsabilidades. Estas sería a ausencia de comunicación con suficiente antelación da situación extraordinaria de seca e da súa repercusión sobre as reservas hidráulicas no encoro, a vulneración do estipulado pola planificación para afrontar as situacións extraordinarias de seca, como é verter un caudal ecolóxico máis de tres veces superior ao mínimo imposto para este aproveitamento, cando se prevé a metade do mínimo imposto, e a realización de obras de reparación e mantemento sen a preceptiva autorización. Ademais incide a oficina en que se sustancia un proceso de tipo penal, polo que ou máis probable é que o procedemento sancionador se atope en suspenso ata tanto se resolva en sede xurisdicional. Valoración do informe do Valedor PX valora o detallado informe presentado polo Valedor e estima que a resolución é lóxica ao estar aberto un proceso penal, e do mesmo xeito abriuse un expediente administrativo, que desde o grupo desexan finalicen pronto. Desde o grupo tamén dirixiron unha queixa á Unión Europea, que así mesmo abriu un expediente pola súa denuncia. O Valedor enviou un informe ao grupo PX de catro folios onde explica a súa actuación ante esta denuncia, solicitando información ante a Consellería de Medio Ambiente e Desenvolvemento Sostible, quen achega un pormenorizado dossier histórico sobre a concesión do Xallas. Neste indícase que o aproveitamento hidroeléctrico é unha concesión de 1958, que obriga á empresa ás disposicións da Lei de Pesca Fluvial, que prohibe a realización de obras sen autorización previa e indica que todos os danos e prexuízos que se produzan de calquera clase serán por conta do concesionario. Estipula, así mesmo, que o caudal ecolóxico obrigado a respectar é de 1,367 metros cúbicos/segundo para todos os meses do ano, sendo o caudal medio vertedura na semana do 3 ao 9 de novembro de 3,42 metros cúbicos/segundo. Ponse de manifesto a existencia dun protocolo de actuación onde o explotador debe comunicar cun mes de antelación a situación extraordinaria de seca e a súa repercusión sobre as reservas hidrolóxicas ou a decisión de reducir a masa de auga por baixo do 20%. Na comunicación Augas de Galicia indica que realizou visitas de inspección os días 9 e 20 de novembro, nas que constatou que nos días 9 e seguintes dese mes as reservas hidráulicas do encoro eran case inexistentes, estando a verter, non obstante, ou concesionario neses días un caudal ecolóxico moi superior ao mínimo imposto, comprobando que se estaban a realizar obras de reparación e mantemento sen dar cumprimento aos requisitos establecidos pola concesión. Por todo iso Medio Ambiente considera culpable da morte de peixes nesas datas na Fervenza á empresa concesionaria e mantén o expediente sancionador que determinará se existe infracción administrativa. PX segundo a documentación recibida estima que o concesionario é o culpable do desastre, pero en todo caso esperan unha pronta resolución dos procesos penal e administrativo abertos que diriman responsabilidades. Novas relacionadas Fonte - Nota de prensa do grupo PX.
- Fotografía de Rosaura Romo Hernández.
|
Semente RSS