O Concello de Laxe ten varios proxectos que se están encauzando nos últimos meses. Atópase xestionando tres obras de gran calado e moi esperadas polos veciños, cada unha polos seus motivos. Trátase do novo campo de fútbol, o Museo do Mar e a mellora do porto.

Segundo informacións do Concello, os avances máis recentes no Museo do Mar fan referencia ao proxecto de musealización, museografía e deseño gráfico, adxudicado á firma Inicia. A compañía comezou a traballar neste proceso, ao igual que o está facendo Abertal cos identificativos e a páxina web.

O departamento de Cultura está xestionando a posibilidade de que a obra do fotógrafo José Vidal se recolla no novo museo para que poda ser disfrutada polas xeracións futuras. Actualmente, atópase en conversas coa familia do defunto artista.

A web oficial do Concello indica que as obras de rehabilitación do Museo do Mar iniciáríanse en 2007 e que os seus obxectivos son “a recuperación do patrimonio arquitectónico, a creación dun recurso cultural local vivo, a dinamización turística do territorio, a integración nas estratexias da Costa da Morte e a valoración do patrimonio inmaterial”.

Polo que respecta ao porto, Antón Carracedo, alcalde de Laxe, reunirase a semana que entra co presidente de Portos de Galicia, Jacinto Parga, para estudar as posibilidades de reformas. Estas estarían destinadas a mellorar o abrigo e a seguridade dos barcos laxenses.

En decembro do pasado ano xurdiu unha forte polémica a partir das declaracións de Parga sobre a posibilidade de non remodelar a dársena como se prometera, algo que indignou aos mariñeiros. Logo rectificou e afirmou que se observaría a posibilidade de acometer unha obra que non afecte tanto a praia. Se non se atopa, farase a reforma tal e como estaba programada. Agora pásase por ese ‘interín’ que pode ser vital para saber que decisión se tomará.

A do campo de fútbol é un dos proxectos que máis se desenvolveu nos últimos tempos. De estar practicamente parado durante varios anos pasouse a acadar o apoio financieiro da Deputación da Coruña e a adxudicación das obras. O documento técnico foi redactado por Singla.

Outras melloras que se realizaron en 2008 en colaboración con outras institucións foron as da rede de abastecemento de auga. Así mesmo, a administración autonómica impulsou definitivamente os traballos na estrada entre Laxe e a Ponte do Porto.

Fonte

• Nova cedida polo semanario O Acontecer redactada por Paula Nieto.
• Fotografía de Marcos Rodríguez.