Esta banda, na que a festa é paradigma do bo facer, creouse aló polos barrios populares composteláns. Dende aí, e doutros lugares do país coma o barrio de Vistalegre, o ferrolán de Caranza ou o concelo da Estrada, o único que ten en mente esta banda é armar troula por todo o país. Así, A Matraca Perversa ten contaxiado o seu espírito festeiro na Noite do Trasno, no Festival de Caldas, no Repercusión, no Fax, na Festa da Dorna, na Festa do Boi... e en moitas outras festas máis. A formación vai e vén, dende que aló polo 2002, grabara o primeiro cedé titulado “Mass Circus Media”. Para o 2005, o grupo xa tiña preparado o segundo, “Evolucionari@s”, contando xa con grandes do país como colaboradores como Uxía Pedreira ou Xurxo Souto, logo de entrar de cheo na panorama artístico participando moi activamente na loita contra o chapapote.

Buscando fusionar ritmos funky, pachanga ou rumba, sempre con mentes de crear e ofrecer unha música que reflicte os seus diferentes gustos e influencias, A Matraca Perversa trata de ser, ante todo, moi bailable. Entre as súas míticas cancións, podemos resaltar a cartea de entrada do programa da Radio Galega Aberto por reformas, que dirixe Xurxo Souto, e que soa cada día ás 16:05. A voz é a de Uxía Pedreira e a festa a pòñen os membros da Matraca.

Patricio Matraca cóntanos un pouco de que vai todo isto: “É a Matraca un enxendro conscente de que naceu para incordiar, molestar aos poderosos, denunciar as inxustizas sociais, o caciquismo, para chuspirlle na cara ao fascismo… é a Matraca unha parte mais dun colectivo social nacido entre A Estrada e os barrios populares de Vite, Vista Alegre, Caranza e que ante todo fai unha música para festexar, para pasalo ben, para reivindicar unha cultura.”

Xa andan aragllando un novo traballo, coa Mala Herba polo medio, como non podia ser doutro xeito. Continuarán co seu proxecto Mordecáns e co seu Son do Porto do Son, e seguramente voltarán participar no Apologhit 2008, logo de que o ano pasado a súa participación fose moi exitosa.

Máis información

• Blog da Matraca Perversa.
• A Matraca Perversa en Komunicando.net.

Novas relacionadas

• Na procura da canción do verán,

Grupos anteriores

• Colleitando música galega (VIII): Faltriqueira.
• Colleitando música galega (VII): Quempallou.
• Colleitando música galega (VI): Ataque Escampe.
• Colleitando música galega (IV): Loretta Martin.
• Colleitando música galega (III): A Compañía do Ruído.
• Colleitando música galega (II): Lamatumbá.
• Colleitando música galega: Dios ke te crew.

Fonte

• Redacción.