Disque por Camelle continúan alérxicos ao rodaballo e o peixe que gustan é o de mar, non o de granxa. O pasado sábado, o pobo xuntábase para demostrar que é unha vila unida, unida para o bo, pero tamén para o malo, e se levan xa moitos meses en loita para que a piscifactoría non sexa unha negra (se cadra verde) realidade, o San Xoán volveunos xuntar para pasar unha das noites máis especiais do ano.

A asociación de veciños "A Pergoliña" organizou unha sardiñada e un concurso de cacholas, que tivo que ser adiantada para que todo a xente, moita emigrada pola xeografía do estado, poidera acodir. Pasárono de medo e reivindircaron que o que comen é sardiña, nada de peixe plano. Así nolo conta a nosa compañeira Silvia Baña, que ademais nos envía estas preciosas fotos das impresionantes cacholas (que nome tan bonito lle teñen en Camelle) construidas polos veciños, entre as que vemos o homenaxe a Man, con esa caseta reprodución exacta da súa morada que montaron os do Treo. Gracias Silvia e gracias Camelle:

O San Xoán de Silvia Baña

O pasado sábado 21 de xuño festábase o San Xoán en Camelle e a pesares de que houbo quen pensou que se facia rodaballo a plancha nada de iso, somos alérxicos. Como moitos de nós somos camelláns de fin de semana pois adiantamos un pouquiño a celebración para pasalo no noso pobo. A asociación de veciños "A Pergoliña" organizou unha sardiñada e un concurso de cacholas (nome das fogueiras camellán), un karaoke e fogos artificiais.

Os rapaces levaron toda a semana preparando as cacholas con trastos que recolleron polas casas, o gañador foi David -o inventor- que fixo unha con forma de volcán con iluminación e todo e onde se queimou o cura de Camelle e a Marisol Soneira. O karaoke non se puido facer por problemas técnicos pero o fallo foi subsanado pola actuación estelar do grupo kilombero de samba de camelle e por dous humoristas espontáneos pero habituais: Lolo do Rato e Fernando do Reseso (este último meu pai) que teñen retranca para dar e tomar, con baile de capoeira acompanando o kilombo. Tamén podedes ver nas fotos a homenaxe que lle fixo a asociación a Manfred, unha réplica exacta da súa caseta, impresionante (obra dos do Trenco).

Fonte

• Silvia Baña.