Francisco Lema de Pazos é o presidente da asociación Nemancos, que organiza o VIII Mercado Medieval de Corcubión os vindeiros 18, 19 e 20 de xullo. Lema de Pazos fala para O Acontecer desta Feira, onde a vila e tódolos veciños se trasladan á Idade Media.

• Xa está todo organizado para a VIII edición do Mercado Medieval de Corcubión?

Os preparativos están moi avanzados, xa que prácticamente temos pechado o VIII Mercado Medieval coa empresa Pegasus e temos unha subvención por parte do Xacobeo para a celebración da Loita das tropas do Arcebispo Rodrigo de Luna cos Cabaleiros dos Condes de Altamira, que este ano a levará a cabo a empresa alicantina “Legend”.

• Que novidades vai haber este ano no Mercado?

As novidades son varias, pero especialmente a exposición de armas de tortura do medievo. Tamén haberá un fakir, dromedarios, e teremos unha zona de xogo infantil e outra para adultos. Ademáis, as celebracións durarán tres días e non dous.

• Con que apoios contades para facer un traballo tan importante?

Bueno, especialmente por parte do Xacobeo, da Dirección Xeral de Turismo, Deputacion de A Coruña e Concello de Corcubión. En canto a persoas e empresas particulares, vimos de sacar un libro do Mercado con publicidade dos negocios e comercios. Aí veráse a xente que colabora económicamente coa organización deste VIII Mercado Medieval de Corcubión.

• Que ideas tedes os organizadores de cara a vindeiras edicións?

A idea principal que temos é consolidar a Loita das tropas do Arcebispo Rodrigo de Luna, pero é moi dificil xa que dependemos de subvencions e nos custa moitísimo esforzo e sobre todo cartos, xa que este evento ascende a 20.000 euros.

• Que mensaxe enviarías á xente para que se anime a participar no Mercado Medieval en xullo?

Creo que este ano a xente vai quedar contenta, hai un día máis de Mercado e será algo máis grande. Pedimos ao pobo que nos axude na montaxe do Mercado Medieval, pois este ano cáenos enriba as Festas do Carmen. Imos ter un traballo moi duro, por iso pedimos a máxima colaboración posible.

Fonte

• Nova cedida polo semanario O Acontecer, redactada por Rafa Mouzo.