Son varios os puntos de Corcubión dende onde chegan queixas sobre a falta de sensibilidade da xente para coa recollida do lixo logo das xornadas de festa. De festa gústanos ir a todos, pero á hora da limpeza, ao remate da troula, que?

Traemos unhas imaxes de Corcubión pero que ben poder servir para toda a Costa da Morte. Ao remate de cada festa todo o mundo vovle a súa vida cotiá e olvida os seus deberes. A semana pasada festexábamos no campo da Redonda o San Pedro de Corcubión. A festa durou ata o luns, pero poucos subiron ata alí logo da festa. Tanto nos custa deixalo todo como estaba?

Así quedou todo, así marchamos todos e deixamos as leiras de varios veciños, que as ceden para a festa e que mesmo prepararon o souto de arriba para a ocasión. As pequenas cabanas (dereita) montadas pola xuventude para adquirir máis intimidade quedaron no medio do souto, sen ningún coidado. As mesas dos veciños quedaron tal cual, e só volveron a casa as fiambreiras baleiras.

Cabe sinalar que non toda a vila a se despreocupa da limpeza. A meirande grande da xente tivo o coidado pertinente para recoller o lixo creado e achegalo aos contedores que había no campeiro. De feito, da noite do sábado ao domingo, cando a xuventude do SPS celebrou a súa romería, pouco quedaba. O mesmo pasaba na mañá do luns, pero disque algo sucedeu esa noite que pouco rubor hoube en deixalo todo a monte.

Xornada de limpeza

Falamos coa concelleira de Servizos Sociais do Concello, María Delia Lado, e comentaba algo triste o asunto. O concello ten pensado realizar unha xornada de limpeza, contando con varios traballadores, pero sobre todo, pensando no voluntariado. A data aínda está por confirmar, pero seguramente será a fin de semana que vén cando se organice unha subida ao campo para afrontar a limpeza. Para iso realizaranse uns carteis para animar á xente a limpar o que entre todos ensuciamos.

Delia apunta que estas cousas sempre pasan. De feito, lembraba a pasada noite do San Xoán, cando a mocidade baixaba ata a praia de Quenxe de troula. Nada ten en contra o concello, o que si apunta Delia é que antes de marchar a rapazada podería deixar todas as botellas nos varios contedores de lixo que hai nos arredores da praia.

Novas relacionadas

• O San Pedro de Corcubión celebreouse por parroquias.

Fonte

• Fotografías de Francisco Santiago López.