A Consellería de Medio Rural acaba de anunciar as axudas de aconsellamento para as explotacións agrogandeiras. As medidas pretenden optimizar o rendemento global das explotacións galegas, dende a calidade da vida dos animais, ata a seguridade laboral.

Nota de prensa de Medio Rural

MEDIO RURAL CONVOCA AXUDAS PARA A UTILIZACIÓN DE SERVIZOS DE ACONSELLAMENTO POR PARTE DAS EXPLOTACIÓNS AGROGANDEIRAS

• Esta iniciativa pretende optimizar o rendemento global das explotacións galegas, mellorando a calidade das mesmas no eido da xestión, da saúde pública, da sanidade animal e vexetal, do coidado do medio ambiente, do benestar animal, das boas prácticas agrarias e da seguridade laboral.
• A utilización dos servizos de aconsellamento facilitará o cumprimento da condicionalidade, establecida por normativa comunitaria, e dos compromisos asociados ao Contrato de Explotación Sustentábel.
• A Consellaría destina a esta orde, publicada por primeira vez este ano, 3.000.000 euros, sendo a subvención máxima por beneficiario de 1.500 euros.
• O prazo de presentación das solicitudes estará aberto ata o 25 de setembro.

Santiago, 26 de agosto de 2008.- A partir de hoxe ábrese o prazo para presentar as solicitudes de axudas á utilización de servizos de aconsellamento agrario por parte dos titulares de explotacións agropecuarias galegas. A orde, que conta cun orzamento de 3.000.000 euros, ten por obxecto sufragar os gastos, en concepto de honorarios, orixinados polos servizos de aconsellamento prestados aos produtores, por parte de entidades inscritas e recoñecidas no Resaxega (Rexistro de Entidades con Servizos de Aconsellamento ou Xestión de Galiza), en materia de xestión, saúde pública, sanidade animal e vexetal, coidado do ambiente e benestar dos animais, así como na aplicación de boas prácticas agrarias e ambientais e da normativa de seguridade laboral.

A posta en marcha, por primeira vez, destas axudas pretende fomentar a utilización destes servizos para incrementar o rendemento global das explotacións, estendendo novos métodos agropecuarios e de xestión para a mellora da calidade da produción agrogandeira, ao tempo que se enriquece a relación entre o sector agrario e o ambiente no que se desenvolve. Deste xeito, o emprego de servizos de asesoramento vén a facilitar o cumprimento da condicionalidade das axudas á aplicación de boas prácticas agrarias, tal e como establece a normativa comunitaria, e a consecución dos compromisos adquiridos coa sinatura do Contrato de Explotación Sustentábel, por parte das explotacións, durante un período mínimo de cinco anos e sen custe para os seus propietarios.

Poderán beneficiarse desta liña os titulares de explotacións agrarias situadas dentro do ámbito territorial galego que se acollan a servizos de aconsellamento. O importe da axuda, destinada a sufragar os gastos de honorarios orixinados por esta prestación, será de 800 euros, no caso de que o solicitante sexa titular dunha explotación cualificada como prioritaria, ou de 600 euros nos demais casos. Ademais, a contía poderá incrementarse proporcionalmente se está situada nunha zona desfavorecida ou en Rede Natura, se ten asinado o Contrato de Explotación Sustentábel, ou se está incluída nun programa de reprodución, de alimentación, podoloxía ou de xestión técnica agronómica de produción e de sanidade vexetal, nunha agrupación de agricultores para tratamentos integrados (Atrias), nunha agrupación de defensa sanitaria gandeira (ADSG) ou no rexistro de explotacións en control leiteiro. O importe máximo de subvención por solicitante e servizo será de 1.500 euros.

As persoas interesadas teñen de prazo ata o 26 de setembro para presentar as solicitudes, nas que se deberá incorporar un orzamento detallado do servizo que se pretende contratar e que recollerá cuestións como as visitas á explotación, as consultas en oficina e telefónicas, e elaboración de actas, informes e cumprimentación do caderno de explotación, entre outras.

Axudas a entidades

>Por outra banda, o Diario Oficial de Galiza publica hoxe a ampliación do prazo de presentación de solicitudes para as axudas á implantación de servizos de xestión, substitución e asesoramento dirixidas a entidades privadas sen ánimo de lucro, cooperativas, federacións, empresas e entidades asociativas do sector agrario. Neste caso, as subvencións van destinadas a financiar os gastos anuais derivados da compra de bens materiais e da contratación de persoal técnico e administrativo que se encargue das tarefas de xestión económica e administrativa das explotacións; do asesoramento técnico aos seus titulares ou da substitución temporal dos mesmos.

Dada a complexidade de reunir os requisitos esixidos por parte das entidades interesadas no prazo estipulado inicialmente, a Consellaría decidiu amplialo ata o vindeiro 8 de setembro.

Fonte

• Nota de prensa do Gabinete de Comunicación da Consellería de Medio Rural.