As primeiras reaccións ante á definitiva aprobación do Plan Acuícola xa comezan a chegar. As primeiras declaracións que nos chegan son dende Merexo. Dende alí, con Antonio Devesa como voceiro, a Plataforma Veciñal asegura que endurecerá as súas protestas e que reforzará a vía xudicial contra o proceso.

A plataforma non entende como a Xunta pode quitarlles as terras aos veciños para darllos a unha multinacional norueguesa. Ademais acusa tanto a BNG como a PSOE de non escoitar as peticións do pobo e de carecer de sensibilidade algunha coas vilas afectadas.

A Plataforma Merexo non se vende avisa tamén de que o Estado de Dereito faraos pagar e responder ao tempo que advirte que o pobo de Merexo non se vai deixar morrer.

Nota de prensa da Plataforma de Veciños de Merexo

A PLATAFORMA VECIÑAL DE MEREXO ANUNCIA O ENDURECEMENTO DAS SUAS PROTESTA E REFORZA A VÍA XUDICIAL CONTRA O “ATRACO” DA XUNTA DA GALICIA Ó APROBAR A PLAN DE ACUICULTURA

TÓDALAS PERSOAS IMPLICADAS NA APROBACION DESTA DESFEITA RESPONDERAN ANTE A XUSTIZA UN POR UN.

A PVM analizará en asamblea a decisión autoritaria da Xunta e porá en marcha novas actuacións co fin de preservar que o pobo continúe nas mans dos seus veciños.

Sempre lle escoitamos ós nosos maiores a frase: Hai días que era mellor non levantarse. Ben, pois onte foi un deses días. Porque todo parece un pesadelo. Os señores integrantes do consello da Xunta firmaron na mañanciña a aprobación do roubo ou usupación de 270.000 metros cadrados da costa de Merexo co fin de entregarllos á empresa noruega Stolt Sea Farm. Os nosos mellores terreos, o frente do noso pobo, contra a vontade dos nosos veciños, pequenos e maiores, contra a vontade das miles de persoas que nos apoian coas súas firmas.

Os integrantes do goberno do cambio filleron coma o raposo pola noite, ainda ser ter rematado agosto, agora que o debate ía sobre se se adiantaban ou non as elección, eles aproban con proceder de estados predemocráticos o Plan de Acuicultura (o plan da desfeita) o plan que roba o suor e as bágoas dos nosos maiores que tanto loitaron polo noso pobo e polo noso futuro.

O PSOE e o BNG, o "goberno do cambio" o "goberno do progreso", os dos "dereitos sociais" os que disque "lle ían dar respeto e voz ó pobo" acaban de perpetrar o dano máis profundo e a navallada máis canalla nunca asestada a Merexo e á ría de Camariñas. Sí, nunca antes o noso pobo sofrira tanto, nunca antes foi preciso sair ás rúas, poñer por diante o noso patrimonio, para defender o que xa é noso. Incrible pero certo.

Cando no seu día anunciamos que hai lugares dabondo na costa sen ter que vir roubar e encher de formigón a extensión de 40 campos de fútbol diante das nosas portas non quixeron ternos en conta. Despreciáronnos e tomáronos por parvos. Esta é a mostra evidente de que ningún dos membros do goberno que se sentaron na mesa do Consello de onte teñen o máis mínimo interés en Merexo, nin na Costa da Morte. Nin son daquí ni teñen a máis mínima sensibilidade con esta terra. Gustaríamos saber ¿cantas planta de acuicultura vai ter fronte a súa casa a conselleira de Pesca ou Presidente da Xunta?. ¿Gustaríamos saber cantos metros cadrados de terra lle terán que expropiar no pobo do Vicepresidente e dos demáis conselleiros que miraron cara outro lado mentres se asinaba esta pena de morte?.

Así podemos anunciar que, cada un dos que asinaron o documento aprobado, e as sinaturas que virán despois responderán ante a xustiza con nome e apelidos. Que non poderán durmir coa conciencia tranquila, que o Estado de Dereito faraos pagar e responder folla por folla, punto por punto, de xeito persoal e profesional.

O pobo de Merexo non se vai deixar morrer, o pobo de Merexo non vai calar, o pobo de Merexo non vai permitir polo civil que estes novos ricos de moqueta e alfombra vermella veñan arruinar o patrimonio que non coñecen, a Galicia na que non viven. Porque loitaremos ata a extenuación e o futuro vai ser moi incómodo. Tan incómodo que non lles quedará máis remedio que soñar permanentemente cos nosos berros, coas nosas reinvidicación, cos nosos dereitos. Porque o temos e farémolos valer coste o que coste.

Novas relacionadas

• A Xunta aproba o Plan Acuícola.

Máid información

• Merexo non se vende.