O pasado mércores 3 de setembro de 2008, os membros da corporación municipal e os técnicos da empresa adxudicataria, xuntábanse para tratar o Plan Xeral de Ordenación Municipal. O caso é que o grupo do BNG non aceptou tratar o asunto ata que non se convoque unha comisión de obras e urbanismo.

Deste xeito queda todo aparcado, o BNG manterá unha actitude pasiva co PXOM ata que a alcaldía non convoque a comisión de urbanismo na que os membros da corporación compartirán pareceres.

Nota de prensa do BNG

O BNG MANTERASE INACTIVO NA ELABORACIÓN DO PXOM, MENTRES NON SE CONVOQUE A COMISIÓN DE OBRAS E URBANISMO.

O mércores día tres, o Alcalde do PSOE de Corcubión convocou unha xuntanza para estudar o Plan Xeral de Ordenación Municipal. A ela asistiu o BNG, xunto co resto de partidos políticos e con dous técnicos de Eptisa, empresa adxudicataria dos traballos de redacción do plan.

O BNG puxo de manifesto na reunión, que non estaba disposto a falar do futuro do urbanismo no pobo, sen saber do urbanismo presente. Así lle fixemos saber a Francisco Javier Lema, que mentres non se convoque a comisión de urbanismo e obras, para informar da situación actual das licencias concedidas, e das obras en marcha, o BNG ía tomar unha posición inactiva.

O BNG é consciente da importancia que supón dispor dun novo plan xeral para os veciños de Corcubión, pero tamén é consciente do interés e da présa que ten o Alcalde por sacalo adiante. Nós non servimos aos intereses particulares , nen as especulacións do solo, Nós so defendemos o interés xeral, e pretendemos escoller as mellores opcións para a colectividade.

Para o BNG, tamén é importante saber cal é a situación urbanística de Corcubión, porque dende que se constituiu a comisión non se fixo ningunha convocatoria ordinaria. Non temos información das licencias concedidas, das paralizacións, das licencias de primeira ocupación, das obras públicas e das súas licitacións. A información é nula, e a comisión non se creou para a demagoxia.

A decisión do BNG é firme. Asumiremos unha actitude pasiva co PXOM, mentres o Alcalde do PSOE, Francisco J. Lema, non convoca a devandita Comisión.

Fonte

• Nota de prensa de Óscar Insua Lema, voceiro do grupo municipal do BNG.