Seguimos a traballar para tentar aclarar a información relativa ao transporte en autobús en a Costa da Morte. No gráfico que acompaña esta nova podedes ver os tempos dos diferentes traxectos, pero tamén imos a analizar máis polo miúdo algún deses traxectos:

Fisterra - Cee - Muros - Noia -Santiago: 3 horas 10 minutos

A Empresa Monbus fai unha estimación dos tempos na súa web.

Fisterra - Baio: 1 hora 10 minutos

Segundo nos contan desde a Empresa Vázquez os tempos calcúlanos con marxes máis amplos do normal para tratar de incluir as posibles continxencias que xurden á hora de prestar os servicios.

Baio - Santiago: 1 hora 15 minutos

A estimación deste tempo ven da Empresa Aucasa.

Fisterra - Coruña (por autopista dende Carballo): 2 horas 5 minutos

Tamén feito pola Empresa Vazquez.

Fisterra - Coruña (por estrada, percorrido marcado en vermello no gráfico): 2 horas 30 minutos.

Dúas formas de chegar a Santiago dende Fisterra

Á vista dos datos podemos comprobar que podemos aforrar 1 hora de viaxe se eleximos coller o bus da Empresa Vázquez que fai a ruta Fisterra - Santiago e logo facer un transbordo en Baio para coller o bus da Empresa Aucasa que fai o servicio entre Baio e Santiago.

A liña a Santiago por Muros e Noia é unha ruta que da servicio a moitos pobos da bisbarra nesa zona e é unha alternativa máis de chegar a Santiago. O potencial turístico desta ruta é moi alto posto que o volume do tráfico de buses permitiría facer paradas nos pobos e pasar un tempo neles ata o seguinte autobús, pero semella que isto tampouco se lle ocorreu a ninguén.

Responsabilidades nesta situación

Despois de ter analizado todos estes datos non creemos que o servicio de autobuses nestas liñas principais sexa tan malo, exceptuando o desastre do que está a acontecer con Camariñas e Muxía, o que pasa é que conseguir información como a que vos estamos a dar é realmente complicado.

Desta dificultade non teñen culpa ás empresas que prestan os servicios na Costa da Morte, a responsabilidade por parte delas virá se non cumpren o que anuncian. Se temos tres empresas distintas, alguén tería que preocuparse de coordinar toda a información e darlla ao usuario. Esa parte fundamental foi esquecida dende sempre por parte da Administración, responsable do funcionamento dos Servicios Públicos.

Levamos moitos anos vendo medidas de todo tipo pero a ninguén se lle pasou pola cabeza crear un organismo que centralice toda á información dos horarios e a facilite aos usuarios.

Moito se lle enche a boca aos políticos cando falan do prioritario que é dar un Servicio de Transporte Público de calidade e de potenciar o turismo na Costa da Morte, sería bo que comezasen por facer que tanto os que vivimos na Costa da morte como os turistas que veñen a visitarnos nos enterásemos de que buses chegan ata aquí primeiro.

Por outra banda non é xusto tratar ás tres empresas do mesmo xeito, Vázquez e Aucasa dende un primeiro momento achegaron toda a información que tiñan dispoñible e prestaron todolos servizos que lles correspondían. Monbus da unha información completa na súa web sobre o traxecto Fisterra - Santiago, pero esqueceu dar a información dos servicios a Camariñas e Muxía dende Cee e polo que vimos vendo estes días parece que tamén esqueceu de prestar dito servicio.

Desde Que Pasa na Costa seguiremos a traballar por ofrecer información util sobre os autobuses da Costa da Morte e poder publicar o resto das liñas como as que dan servicio a Mazaricos, Laxe e Malpica entre outras que faltan.

Fonte

• Redacción de Que Pasa na Costa.