Son Irene García Patiño e levo 5 anos traballando na Costa da Morte como veterinaria no Hospital Clínico Veterinario Argos, en Cee. Desde que cheguei a esta terra a situación da recollida de animais abandonados, sobretodo cans e gatos, non mellora, e mesmo empeora.

A triste realidade móstranos que en toda a bisbarra non hai un só sitio que funcione como "perrera" municipal, e os concellos non cumpren a súa obrigación de recoller os animais abandonados que deambulan polas súas rúas.

Hai "perreras" en A Coruña, Santiago e Carballo pero non teñen espazo para os cadelos atopados nas bisbarras colindantes.

Ante esta situación irregular, a Clínica Veterinaria Argos leva moito tempo actuando de "perrera" de facto, aceptando acoller aos animais que se atopan nas rúas da Costa da Morte. Pero, aínda que a maioría dos concellos teñen un acordo coa clínica, só os de Fisterra e Dumbría e, desde o último cambio de goberno parece que tamén o de Cee, pagan as facturas que conleva a recollida e o coidado destes animaliños, mentres que o resto de concellos lávanse as mans.

Para tentar mellorar a situación, o Hospital Clínico Veterinario Argos en colaboración con Que pasa na Costa, acaban de crear o servizo Salvacadelos, que pretende axudar a atopar fogares de recollida aos animais que alí cheguen.

Se atopas un cadeliño abandoado, chama ao teu concello

Temos que pedir a toda a xente que se atopa un cadeliño, que chame ao seu concello. Eles xa se porán en contacto coa Clínica Argos e desde alí pasaremos a recollelo, pero sempre é preciso que sexa o concello  o que informe a Clínica, nunca directamente o que atopa o cadelo.

Do mesmo xeito, se alguén está interesado en acoller a outro compañeiro na súa casa, que pase polo Hospital Clínico Veterinario Argos de Cee, e que pense que alí hai sempre unha criatura agardando unha nova familia.

Máis información

• Salvacadelos