|
Ao igual que ocorre en Corcubión, non está todo o concello dacordo coa rexeneración das praias de Area Maior e Cánido en Malpica. Un proxecto complexo, que implica unha actuación de dragado, que moitos consideran un impacto demasiado grande para o litoral. Así o advertía ADEGA sobre a rexeneración da praia de Corcubión. O caso é que dende a Plataforma Seiruga Limpa pregúntase sobre as vantaxes do proxecto de rexeneración, como fixera a pasada semana a oposición malpicá. Alfonso Vidal apunta que a extracción terá lugar na zona de Seiruga, entre o Punta da Charna e a Punta Ghaliana (na foto vemos a praia de Encidre), supoñendo unha nova ameaza para un espazo que está á espera do Plan Acuícola. Por que en Seiruga? A Plataforma dubida como influirá a extracción de 100.000 m3 de fondo mariño, que poden chegar aos 280.000. "A ver cantos collen", pregúntanse por Seiruga, que non gustan do calificativo de "Zona de Préstamo" que indica o proxecto. Alfonso pide control sobre o dragado, pero sinala que a elección da zona de Seiruga pode ter que ver co Plan Acuícola. "O tubo de admisión de auga irá precisamente por onde queren facer o dragado, así que pode que lle anden facendo sitio xa", sinala Alfonso. Dende Seiruga apuntan que mellor iría se se preocupase en recuperar o Castro de Entretorres ou en colocar uns servicios e unhas duchas na praia de Seiruga, no canto de roubarlle a area. Botade un ollo ao blog da Plataforma, que lembra que Seiruga non quere ser a nena dea de ninguén. E falando de dragados, alguén se pregunta por como vai quedar a ría de Corcubión trala ampliación do Porto de Brens?. Está programado un peirao de ata 710 metros, cun dragado de 110.000 m3 de fondo mariño.
Novas relacionadas Fonte
|
Semente RSS