A política dumbriesa continúa sendo un foco de polémica, dos máis quentes de toda a Costa da Morte, ata o punto de chegaren a insultos persoais nos medios de comunicación. Así, puidemos ler e escoitar ao voceiro do PP, Ramiro Iglesias, falar de "dictador" e "cacique", referíndose ao alcalde José Manuel Pequeño. pero tamén puidemos escoitar aos representantes do goberno municipal asegurar que o PP de Dumbría "non é un partido político", e o seu voceiro "só é un paiaso que está en política por interese particular".

Pleno de 5 minutos

Se en Corcubión non tardaban 5 minutos en dar por zanxado un pleno, a semana pasada ocorría o mesmo en Dumbría. O voceiro do PP, Ramiro Iglesias, a única oposición que hai en Dumbría, erguíase ante o que claificaba de "falta de democracia" ao negarlle o alcalde a posibilidade de intervención no punto referido á reclamación presentada aos orzamentos municipais do 2009. Frases do calibre de "mordaza ditatorial a liberdade de expresión" ou "Dumbría ríxese pola Lei Pequeno/83" son utilizadas continuamente por Ramiro, indicando que o caciquismo non marcha do concello dende 1983, ano no que Pequeño entraba no poder.

Pequeño argumentou que o debate sobre os orzamentos do 2009 xa tivera lugar no seu correspondente pleno, e que o voceiro do PP só pretendía "entorpecer a vida municipal".

Pouco aforro e pouco emprego

O edil do PP, logo do pleno volta a saír á voz pública no Diario de Bergantiños, asegurando que o goberno non ten claridade económica e o acusa de "malgasto", ademais de "convertero concello nunha sucursal do INEM".

Ramiro non admite nin entende como é posible que, nun Concello como o de Dumbría, con pouco máis de 3.000 habitantes, "o persoal do Concello sexa de 25 traballadores, entre altos cargos, persoal da administración e persoal laboral, sen contar cos traballadores do último obradoiro que nos concederon".

Orzamentos

Ramiro repasa as contas de gasto municipal en soldos. O orzamento municipal do ano 2009 ascende a 4.610.477, 46 euros, deles 1.460.390 euros son para pagar ao persoal e outros 1.645.951 euros para gastos de mantemento do propio Concello. "As inversións previstas para ou 2009 son de 1.486.823 euros. O 68% corresponden a gastos deixando tan só un 32% para inversións", sinala Ramiro. Unhas cifras que, na súa opinión, están lastradas pola excesiva carga do persoal e polo seu alto custo de mantemento "cando non temos servizos nin infraestruturas non Concello".

Novas relacionadas

• Ramiro Igrexas culpa da derriba da nave de Fariña á política urbanística do Concello de Dumbría .
• O voceiro do PP leva a actitude "dictatorial" de Pequeño ao Valedor do Pobo .
• Pleno expreso en Corcubión.

Fonte

• Diario de Bergantiños.
• Fotografía cedida por Manuel Sambade, do Diario de Bergantiños.