|
Por segunda vez en dúas semanas a Xunta decide suspender as clases en todo o país. Así, todos os rapaces das garderías (as privadas poden continuar coa actividade baixo o consello da Xunta de suspensión), colexios e institutos ficarán unha vez máis na casa. Ademais, Protección Civil aconsella á poboación adoptar as medidas de autoprotección oportunas, xa que mañá achegase "un centro de baixas presións moi profundo deixando ventos fortes, con refachos moi fortes no litoral entre Fisterra e Viveiro e zonas altas do norte de Lugo e A Coruña", que poden chegar aos 140 km/h. Hai declarada Alerta laranxa tanto polo vento e coma no mar. As choiuvas serán máis moderadas. As horas máis duras serán entre ás 10:00 da mañá a 20:00 da tarde. A imaxe corresponde a vila de Corcubión ao longo da mañá do luns. Nota de prensa da Xunta de Galicia O Goberno galego suspende a actividade lectiva nas escolas infantís públicas e en todo o ensino non universitario de Galicia - O conselleiro de Presidencia, Administracións Públicas e Xustiza, José Luís Méndez Romeu confirmou hoxe a suspensión da actividade lectiva nos centros da rede educativa da Comunidade Autónoma galega, agás a Universidade
- Segundo explicou o titular do departamento, prevense ventos de máis de 100 km/h e choivas que poden acumular os 40 litros en 12 horas
- Méndez Romeu asegurou que foron prealertados e alertados, mediante o envío de 1.141 faxes e 770 sms, empresas e organismos que se poidan ver afectados ou vexan comprometida a súa intervención
- A Vicepresidencia da Igualdade e do Benestar da Xunta acordou a suspensión das actividades desenvolvidas nas escolas infantís dependentes da mesma e aconsellou que as escolas infantís de titularidade privada adopten medidas de semellante natureza para garantir a seguridade da súa comunidade educativa.
Santiago, 8 de febreiro de 2009.- O conselleiro de Presidencia, Administracións Públicas e Xustiza, José Luís Méndez Romeu, confirmou esta tarde a suspensión da actividade lectiva en todos os centros públicos, privados e concertados da rede educativa da Comunidade Autónoma galega, agás a Universidade. Segundo explicou o titular do departamento, o nivel de risco do fenómeno de meteoroloxía adversa de nivel de alerta laranxa por vento en terra que afectará a partir de mañá a Galicia “é suficientemente importante como para adoptar estas medidas”. Méndez Romeu explicou que o episodio meteorolóxico adverso que entrará mañá na Comunidade provocará ventos de máis de 100 km/h e choivas que poderán acumular os 40 litros por metros cadrado en 12 horas. Igualmente, destacou que os refachos poderán ser especialmente intensos entre Fisterra e Viveiro, con posibilidade de acadar, puntualmente, os 120 ou 140 km/h. No resto de Galicia, a intensidade oscilará entre os 100 e 120. O conselleiro de Presidencia, Administracións Públicas e Xustiza sinalou, no Centro de Atención ás Emerxencias 112 Galicia, que “a estas horas a Consellería de Educación está informando aos directores de todos os centros educativos públicos, privados e concertados de Galicia, que xa foran prealertados desta situación o pasado venres, para asegurarse de que mañá se reduzan os desprazamentos innecesarios e se adopten as medidas de seguridade e prevención oportunas”. Méndez Romeu dixo que “esperamos que esta decisión sexa comprendida pola poboación. Somos conscientes das molestias que isto pode causar, pero entendemos que o nivel de risco é suficientemente importante como para adoptar estas medidas”. Ademais, lembrou que os efectos deste episodio de meteoroloxía adversa foron informados, dende o pasado venres, a todas as entidades e organismos que se poidan ver afectados ou que vexan comprometida a súa intervención mediante o envío, dende o 112 Galicia, de 1.141 faxes e 770 sms. Doutra banda, o titular do departamento autonómico lembrou que a Consellería de Educación “disporá un responsable que informe ás familias en todos os centros da Comunidade, así como a través do servizo de transporte escolar co fin de garantir a seguridade dos rapaces”. Tamén aproveitou para recordar á poboación a importancia de seguir as medidas de autoprotección como evitar desprazamentos e afastarse de edificios en ruínas ou en construción, árbores e paneis publicitarios. Igualmente, aconsellou aos condutores que, no caso de vérense obrigados a desprazarse, axeiten a velocidade ás condicións da vía, pois pódense producir desprendementos de terra e pedras. Por último, Méndez Romeu asegurou que a partir de mañá e mentres dure este episodio de meteoroloxía adversa, o persoal do 112 Galicia “reforzarase ao máximo” e comprometeuse a dar unha resposta eficaz a cada unha das emerxencias que se poida producir. Escolas infantís A Vicepresidencia da Xunta acordou esta tarde suspender as actividades desenvolvidas nas escolas infantís dependentes da mesma durante a xornada de mañá, luns 9 de febreiro. Esta decisión adoptouse tras coñecer o último informe emitido pola Consellería de Presidencia no que se recolle que no día de mañá a Comunidade Autónoma verase afectada por un episodio de meteoroloxía adversa, motivado por fortes ventos, que cualifica de nivel laranxa (risco importante), circunstancia que aconsella a adopción de medidas urxentes para a protección da comunidade infantil. Diante de tal alarma, a Vicepresidencia da Igualdade e do Benestar acorda a suspensión das actividades desenvolvidas nas escolas infantís dependentes da mesma e aconsella, ademais, que as escolas infantís de titularidade privada adopten medidas de semellante natureza para garantir a seguridade da súa comunidade educativa. Co obxecto de garantir que todas as persoas afectadas poidan ser informadas oportunamente da decisión adoptada e se lles preste a axuda que poidan precisar, a dirección dos centros garantirá a presenza no centro de todo o seu persoal. Asemade, a Vicepresidencia da Xunta ten avisados aos restantes centros dependentes da mesma para que extremen as precaucións durante toda a xornada de mañá ante as condicións meteorolóxicas adversas. Máis información Novas relacionadas Fonte - TVG.
- Nota de prensa da Xunta de Galicia.
|
Semente RSS