|
A editorial compostelá “Follas Novas Edicións”, que dirixe o profesor e crítico literario Luís Alonso Girgado, vén de reeditar na súa colección “Libros da Frouma” o poemario Mar de ausencias, de Modesto Fraga (Fisterra, 1974). O mar volta ser o protagonista, para o bo e para o malo, nos novos poemas. O volume consta de corenta poemas (dez máis que na edición de 1999) acompañados de ilustracións e cartografía orixinal da autoría de Javier Campaña Martínez, expresamente adaptada aos textos que conforman o libro. Nese senso, a obra presenta unha singular novidade ao incluír determinados paratextos (como son a cartografía e as coordenadas xeográficas do ámbito costeiro fisterrán), co obxectivo de relacionar o poema como abstracción subxectiva do imaxinario humano coa imaxe espacial e científica que ofrecen as coordenadas cartográficas. Por conseguinte, tanto o autor dos textos coma o ilustrador encargado de plasmalos na cartografía tiveron que levar a cabo un intenso traballo de colaboración aos efectos de situar, de xeito paralelístico, dous ámbitos do coñecemento tan aparentemente opostos como son a arte creativa e a científica. O resultado –como non podía ser doutra maneira- resultou moi gratificante e sumamente enriquecedor. Dúas palabras do autor Mar de ausencias é un libro de poemas inspirado na realidade emocional e vital dos homes e mulleres do mar da fin do mundo. O mar como esperanza, como maldición. A vida como tributo, como sacrificio, como herdanza ensalitrada dunha estirpe inmorrente. Ao longo dos tempos a esgrevia costa fisterrá foi testemuño de innumerables naufraxios, de sonadas catástrofes que deixaron gravado para sempre nas nosas retinas un negro ronsel de orfandade. Son centos –quizais milleiros- os rostros sen nome, as vidas sen rostro que aínda fican perdidas nalgún lugar da memoria. O mar consiste niso, nun lugar habitado. E velaí o paradoxo, a constatación da ausencia, o outro necesario leit motiv duns versos que se apresuran a retar con decisión ao sempre poderoso e omnipresente mar. Heroinas e naufraxios Hai tamén espazo nas páxinas do libro para render debido tributo ás verdadeiras heroínas da Terra que son “as viúvas dos vivos e as viúvas dos mortos”, xa versificadas por Rosalía de Castro en “Follas Novas” e que, de certo, ocupan un lugar preferente ao longo de toda a obra. O mesmo sucede cos náufragos dos pesqueiros “Bonito”, afundido en 1960 en augas de Fisterra (nas inmediacións do Cabo da Nave) e no que perderon a vida os seus once tripulantes; “Begoña”, que lle custou a vida a seis lobos de mar da localidade en xaneiro de 1976 e “Isleña”, entre moitos outros. Para eles, todo este alento de palabras e recordos, de buguinas, de “palaxas” verdadeiras. O mar,o mar, o mar. Velaí o reto, o único regreso posíbel. Bibliografía de Modesto Fraga Modesto Fraga Moure (Fisterra, 1974). Formou parte do Batallón Literario da Costa da Morte e do consello editorial da colección de poesía “Letras de Cal”. Poemas da súa autoría aparecen recollidos en diversas antoloxías como Mar por medio, 25 anos de poesía galega (1975-2000), Das sonorosas cordas, Poetas e narradores nas súas voces, A poesía é o gran milagre do mundo ou El mundo al otro lado, entre outras. Membro da AELG e do PEN Clube de Galicia, a súa obra foi galardoada cos premios “Avelina Valladares”, “Ramón Cabanillas”, “Rosalía de Castro” e “Francisco Fernández del Riego”, entre outros. Obra poética - De mar e vento (1997-coautor)
- Mar de ausencias (1999. 1º Ed.)
- Ese estraño silencio (2002)
- Derrotas con raíces (2007).
Novas relacionadas Fonte e máis información
|
Semente RSS