A pasada fin de semana, armados de valor baixo un tempo infernal, un grupo de corcubioneses partiron do Fieiro para percorrer o emblemático Monte Pindo. Eliximos esta subida, que está en pleno proceso de desenvolvemento. É a Asociación Cultural Perfecto Sande Braña de Mazaricos á que está a realizar, cunha subvención de Medio Rural, a sinalización da ruta, que se pechará para facer un percorrido circular e se intentará homologar como acaban de facer cunha ruta no concello de Laxe.

A boa

O percorrido da ruta lévanos dende o Fieiro ata a Moa, para facer a volta polo pico de Peñafiel e voltar case que ao mesmo lugar logo de atravesa o val do río Cancelada. A volta aínda non está sinalizada, pero a subida á Moa está perfectamente marcada. E marcada de xeito exemplar, sen demasiada intervención, con palotes de madeira e sen deixar lugar á posibilidade de perderse.

A mala

Pero as novas non son todas tan positivas. Ao subirmos ata a Moa, a poucos metros baixo o pico máis alto do monte (627m), hai un lugar moi especial. Aló atopamos os restos do que puido ser unha vella igrexa, ou non. As pedras fican ciscadas pola zona, a hedra cobre os restos das pedras, e moitas destas pedras traballadas sirven para facer as barbacoas, que malia que está prohibido, ninguén repara.

O caso é que aló, embaixo dunha coviña entrañable e dun dos gravados rupestres que se coñecen no monte, había un fermoso piñeiral, que daba sombra a un pequeno campeiro, que servía para tomar un respiro trala dura subida, sobre todo dende O Pindo. Xa non o hai.

Resulta que este lugar é usado pola propia Asociación Perfecto Sande Braña de Mazaricos, e pola Caixa Galicia, para facer unha churrascada conxunta cada ano, que este ano terá lugar o 4 de xullo. Os veciños de Mazaricos e mais os traballadores da Caixa, precisaban dunha infraestrutura para estar cómodos nesta xuntanza, e pedían constantemente unhas mesiñas á Asociación.

Falamos con Juan Jurjo, da Asociación Perfecto Sande Braña. Juan explicounos as causas que comentamos do por que da actuación no piñeiral da "igrexa". Co permiso de Medio Rural, a asociación cortou unha boa ristra de piñeiros, que segundo Juan Jurjo, estaban queimados dende o fatídico verán do 2006.

Informámonos ante esta afirmación, e segundo varios especialistas e amantes do monte, entre os que destacamos ao corcubionés Bruno, e mais ao Presidente da Comunidade de Montes Veciñais en Man Común de Caldebarcos e San Cibrán, Domingo Martínez Beiro, o piñeiral non fora afectado completamente no incendio, e a día de hoxe materíase practicamente enteiro. Se ben a foto é de anos anteriores tentaremos conseguir unha foto do piñeiral de hais uns meses.

Para nós, esta actuación non é para nada positiva. Acabar cun piñeiral para realizar unha área de descanso a máis de 500 metros de altura non nos parece o máis axeitado, en tanto que os que chegan ata ese punto, teñen que amar o suficiente a natureza como para priorizar os piñeiros ás mesas de picnic.

Máis información

• O Monte Pindo de Galicia e os grabados rupestres prehistóricos.
• Coñecendo as lendas históricas do Monte Pindo.

Novas relacionadas

• Segunda rota de sendeirismo homologada en Laxe.
• Cee vai este verán de ruta de sendeirismo.
• Contando os días para o I Encontro Monte Pindo.
• A Confraría do Pindo artella as IV Xornadas de Pesca.
• En marcha o proxecto "Pindo Mariño".

Fonte

• Redacción de QPC ( Este enderezo de correo-e está protexido contra spam bots, necesitas ter o Javascript activado para podelo ver ).