A tradición coral de Baio completou esta pasada fin de semana o esplendor da actuación na casa da Coral Xan Mella. A Igrexa nova estaba a reventar, para celebrar o VII Encontro de Corais. Ante de chegar o punto culminante da noite, pasaron por escea a Coral a Gaiteira de A Coruña e máis a Coral piloñesa Ars nova de Infiesto (Asturias).

Pero a xente tiña claro á súa favorita. Para pechar a cita, o público levou en volandas á coral anfitriona Xan Mella dirixida por Tatiana Pankrátova. Non deixa de mellorar a coral, e os matices harmónicos cada día están mellor traballados. Moi aplaudido foi o tema "Lela" (a primeira vez que se cantaba en Baio) e as dúas habaneras. O alcalde zaense, Lolo Muíños, agasallou á Coral, como vemos na imaxe.

Cachelas de San Xoán

A AMC Pepe Valiña-Coral Xan Mella organiza a tradicional Cachela de San Xoán mañá martes 23 de xuño na Praza Braulio Astray de Baio. Haberá sardiñas e boroa de balde e a festa principiará ás 21:30: da noite.

Serán máis de mil sardiñas as que se repartirán aos asistentes estimados en máis de trescentas persoas.

Non faltará a música e a cantina este ano é pro-comisión de festas de Baio, uns rapaces que están traballando arreo para que a vila labartina teña as festas de San Cristobal e Santa Bárbara que se merecen.

Novas relacionadas

• Dende a Coruña a Zas a ritmo de Coral.
• A presentación do primeiro libro de Jano Lamas foi unha festa de todo Corcubión.
• Da Coruña a Zas coa Coral Xan Mella de Baio.
• A Coral Xan Mella de Baio encandilou Muxía.
• O Terra Meiga da Coral Xan Mella de Baio fai tremer Xixón.

Fonte

• Blog da Coral polifónica Xan Mella.