Non faltou a Costa da Morte na XII edición do Certame de Teatro Intercentros. Participaban nada menos que uns mil douscentos actores noveis, representando a 85 grupos, pero aló estaban dous actores da nosa bisbarra para acadar un dos ansiados premios. A gala da "a meca" do teatro afeccionado celebrouse o pasado venres no centro Calvo Sotelo da Coruña.

Tan só o concello de Zas presentara as súas candidaturas aos premios, e son dous os que volven para a Costa. O primeiro, nada menos que en categoría senior: Marco Álvarez Rodríguez gañou o premio ao Mellor Actor Sénior, aí é pouco, pola obra "Bancagare: sucursal número 13", de Badius Teatro, de Baio. Xa podedes pasar polo Grupo de Facebook do teatro Badius que creou o propio Marco.

Marco naceu en Suíza, e rematou en Baio logo de vivir un tempo en Oviedo. As súas ocupacións levárono por Santiago, Carballo e Laxe, sempre tendo Baio como referente, xa que a afección ao teatro mantívoo unido á vila zaense. Así é membro do grupo de teatro Badius Teatro.

Tamén houbo premio en categoría xuvenil. En 5º lugar quedou a obra DRÁCULA, do prolífico Instituto Maximino Romero Lema. Estamos ante un centro cultural tremendo e así o refrendan por exemplo os dous premios do Concurso Benéfico de Murais de Azulexo de Lar.

Novas relacionadas

• Badius comparte experiencia na escola de teatro do Banco de Tempo de Zas.
• O grupo de teatro de Cee estreouse na casa.
• O IES de Baio volve gañar o Concurso Benéfico de Murais de Azulexo de Lar.

Fonte

• Nota de prensa da Deputación da Coruña.
• Fotografía de Fran Torrecilla.