|
Durante os meses de xullo e agosto, non haberá escusa para que as noites no concello de Cabana de Bergantiños sexan un aborrecemento. Porque desde o Departamento de Cultura se artellou unha variada programación cultural que, atendendo ás demandas de todo tipo de público, obrigarán a cabaneses e visitantes a coller a cama cun pouco máis de tardanza. Todas as actividades terán inicio ás 22:00h da noite, agás a Noite Celta no castro A Cidá e a Noite Medieval de Riobó, e a súa realización espallarase polas distintas parroquias do municipio. Camiñadas O punto de partida deste Verán Cultural 09 en Cabana de Bergantiños terá lugar o vindeiro venres 3 de xullo cunha camiñada pola senda da Ribeira con saída desde a praia da Urixeira. Non será a única ruta do verán xa que para o luns 10 de agosto está programada a Noite das Estrelas, na cal o físico baiés Jorge Mira guiará ós viandantes nocturnos desde a aldea de Anos ata os altos cumes do monte da Eirita. A última proposta de andar terá lugar o sábado 22 de agosto con outra camiñada nocturna polo rego dos Muíños con saída desde a praza de Canduas. Actividades para cativos O público infantil tamén será protagonista nestas Noites de Verán. Así, o venres 10 de xullo poderán acudir na praza de Neaño á proxección da película La brújula dorada, o venres 17 á actuación do mago Romaris no campo do Briño, o domingo 9 de agosto ó espectáculo dos pallasos Tul y Pan no campo do San Fins do Castro e o domingo 23 á sesión de maxia con Cristian Magic na praza de Canduas. Noites meigas No programa deste ano destacan tres noites festivas. A gran novidade é a creación do festival Noite da Mocidade na que a música rock virá da conta do grupo carballés The Cerne acompañados dun obradoiro de danza moderna coas compoñentes das Dríadas. Por outra banda, continúase coa tradicional Noite Celta no castro A Cidá de Borneiro. Esta cita comezará máis cedo, a partir das seis da tarde do venres 24 de xullo. Este ano a animación histórica correrá a cargo do grupo de teatro Os Quinquilláns e das actuacións musicais terán conta o grupo folk Ruote da Coruña e a banda de gaitas Malante de Malpica de Bergantiños. Nas chousas que bordean o castro, ademais de poder degustar carne de porco celta á grella, os visitantes poderán visitar distintos postos de artesanía. A última noite festiva viaxará no tempo desde as catro da tarde do sábado 8 de agosto ó pasado medieval da parroquia de Riobó. Despois do éxito acadado coa masiva concorrencia de público do ano pasado, a aldea de Riobó atraerá a novos visitantes con ofertas lúdicas como o tiro con arco, animación histórica coa compañía Zancalino, artesanía, degustación de pratos típicos e distintos obradoiros artesanais. Este ano, a música tradicional soará cos pontevedreses Pai da Cana. Aquí embaixo vemos unha escena da noite do ano pasado. 
Programa Xullo - Venres, día 3. PRAIA DA URIXEIRA: 22.00 h. Camiñada pola Senda da Ribeira con saída desde a Praia da Urixeira (Neaño);
- Venres, día 10. PRAZA DE NEAÑO: 22.00 h. Noite de cine. La brújula dorada.
- Venres, día 17. CAMPO DO BRIÑO: 22.00 h. Noite da Maxia. Actuación do mago Romaris. No Campo do Briño (Borneiro)
- Venres, día 24. CASTRO A CIDÁ DE BORNEIRO: A partir das 18.00 h. Tarde-Noite do Castro Animado. Degustación de porco celta. Música tradicional con Ruote e coa banda de gaitas Malante. Animación histórica con Quinquilláns. Postos de artesanía. No castro A Cidá (Borneiro).
Agosto - Venres, día 7. PRAIA DO PENDÓN: 22.00 h. Noite da Mocidade. The Cerne e obradoiro de danza moderna a cargo das Dríadas.
- Sábado, día 8. RIOBÓ: A partir das 16.00 h. Tarde-Noite do Medievo. Tiro con arco, animación coa compañía Zancalino, música tradicional co grupo Pai da Cana, artesanía, degustación de productos típicos, obradoiros.
- Domingo, día 9. CAMPO DE SAN FINS DO CASTRO: 22.00 h. Noite infantil. Pallasos “Tul y Pan”.
- Luns, día 10. A MEDOÑA: 22.00 h. Noite das Estrelas. Percorrido nocturno circular guiado por Jorge Mira desde Anos ata a Pena da Eirita. Saída do Local Social da Medoña en Anos.
- Sábado, día 22. REGO DOS MUÍÑOS: 22.00 h. Camiñada nocturna pola senda dos muíños. Saída do Campo da Festa de Canduas.
- Domingo, día 23. CANDUAS: 22.00 h. Maxia con Cristian Magic na Praza de Canduas.
Organizadores e colaboradores No desenvolvemento deste programa cultural colaboran a Consellería de Cultura e Turismo, a Deputación da Coruña, as seguintes asociacións do concello de Cabana de Bergantiños: Asociación de Veciños San Martiño de Riobó, Asociación Cultural Pedra da Vella, asociacións de Festas de Borneiro, Canduas e Cesullas e o Programa Concellos Saudables. Novas relacionadas Fonte
|
Semente RSS