O pasado sábado, día 24, un das nosas figuras máis relevantes no mundo da literatura actual, Modesto Fraga, ofrecía en Castrelo de Miño (Ourense) unha charla-coloquio sobre a poesía da Costa da Morte, dentro das actividades organizadas pola Asociación Cultural Nacionalistas do Ribeiro. O acto resultou sumamente fructífero a teor do interesante debate que, posteriormente, se levou a cabo e que servíu para achegar as creacións dos autores da Costa da Morte ao público asistente á sesión.

O acto, enmarcado nas xornadas culturais que esta asociación leva a cabo ao longo de todo o mes de outubro, deu comezo ás 20:00 horas e tivo unha duración aproximada de 90 minutos. Modesto ofreceu un periplo plural dalgunhas das voces que conforman o noso imaxinario poético máis rico.

Nese tempo, Modesto Fraga aproveitou para ofrecer unha panorámica exhaustiva da nómina de autores que, na actualidade, conforman o espectro literario da nosa bisbarra (desde Miro Villar pasando por Estevo Creus, Miguel A. Mato Fondo, Marilar Aleixandre, Paco Souto, Rafa Villar ou María Lado). Sen esquecer, porén, a obra de figuras tan senlleiras da nosa historiografía como Eduardo Pondal, Gonzalo López Abente, Enrique Labarta Pose ou Antón Zapata, entre outros.

Vindo ao caso, Modesto presentou a última novidade en materia literaria da bisbarra. Trátase da antoloxía poética De Pondal ao Batallón Literario. 120 anos de poesía na Costa da Morte, realizada entre Miro Villar e o propio Modesto, e publicada recentemente pola editorial Sotelo Blanco e a Asociación Neria. 

Ao mesmo tempo, mostróuselles aos asistentes o pioneiro proxecto virtual elaborado polo Consello da Cultura Galega (Google Earth), onde a poesía da Costa da Morte aparece recollida na súa versión máis moderna.

Houbo tempo, ademais, para lembrar a inxente actividade desenvolvida na década dos anos 90 polo Batallón Literario da Costa da Morte e para ofrecer unha mostra biobibliográfica dos seus autores e publicacións máis destacadas ("Feros Corvos", "Nós", "Mar por medio", etc.).

Máis información

• modestofraga.com.

Novas relacionadas

• Voando en verso pola Costa da Morte.
• Miro Villar e Modesto Fraga presentan a primeira antoloxía poética da Costa da Morte.
• A bitácora da semana (XLI): O blog de Modesto Fraga.
• Fisterra rendeu a súa homenaxe ao mar a golpe de poesía.
• Modesto Fraga leva a poesía ata o fondo do mar de Fisterra.
• Paco Souto escribe a radio.
• Manolín desata a súa pasión pola poesía tralos micros da radiONeria.

Fonte

• Información de Modesto Fraga.