Pese á xélida tarde do domingo e a que moitos programaron visitas comerciais ás grandes superficies de compras da cidade da Coruña, o grupo de música infantil Mamá Cabra foi quen de encher ata os topes o Auditorio Municipal de Cabana de Bergantiños. Mamá Cabra é ademais un dos valores crecentes da escena didáctica musical do país, e van concello a concello facendo concertos con intención educativa, ao igual que o grupo Os tres tenedores.

Durante a hora que durou o concerto, cativos e cativas non só de Cabana de Bergantiños, senón tamén de Ponteceso, Corme e Laxe disfrutaron, escenificaron e cantaron os atractivos temas de Gloria e compañía. Con isto demóstrase que ás veces, a programación cultural realizada por un concello non só é atractiva para os seus veciños, senón que tamén amosa interese para outros dos municipios lindantes. Nesta ocasión non só os nenos gustaron da música, senón que tamén pais e nais se sumaban á festa como se de verdadeiros infantes se tratase.

Tras a finalización do concerto os músicos fartáronse de vender libros e discos para que despois os cativos continuasen lectura e audición nas casas. Tamén houbo quen suxeriu que para o próximo concerto trouxesen algunha camiseta para vender.

Novas relacionadas

• Cabana, a capital da cestería.
• Cabana prefire acordeón que o Barça-Madrid.
• Doce domingos recuperando o patrimonio musical nos salóns do rural de Cabana.
• Homenaxe coral ao párroco de Canduas.
• Cabana homenaxea ao regueifeiro Fermín Calvo no Salón Social de Silvarredonda.
• Cerqueda e o Couto celebraron a gran festa da lingua retranqueira.
• Un libro a Celestrino.

Fonte

• Departamento de Cultura e Deportes do Concello de Cabana de Bergantiños.