|
Xa o anunciaban en novembro dende a Deputación. I é que veñen de de adxudicar o proxecto de rehabilitación de Dombate cun orzamento de 1.514.492 euros. Será a empresa Construcións en Pedra Sigrás S.L. a adxudicataria provisional para a realización dos traballos, logo dun concurso no que participaron un total de 24 empresas. O prazo de execución será de 10 meses desde a formalización do contrato coa Deputación da Coruña, que se producirá a finais de mes. Así as obras comezarán a mediados de xaneiro de 2010, segundo a previsión dos técnicos provinciais. Aquí abaixo mostramos varios detalles do proxecto, que contará con 2 edificios. Un proxecto galego O proxecto para a recuperación de Dombate foi redactado polo arquitecto coruñés Francisco Vidal. No documento contémplase a construción de dúas edificacións independentes, unha para protexer o dolmen e outra que albergará o centro de recepción e interpretación do monumento. O primeiro inmoble resólvese cunha cuberta a catro augas, con estrutura de madeira, que apoia sobre alicerces metálicos e cubrición de cobre. Esta edificación ocupará unha superficie de 900 m2 protexendo o dolmen e o seu túmulo. A formulación estrutural posibilita xerar un zócalo transparente, que permita seguir contemplando o monumento na súa contorna. Ao redor do mesmo unha pasarela, circular permitirá a visión próxima. A importancia das condicións climáticas Para Francisco Vidal, "un dos principais obxectivos a conseguir, é que as condicións climáticas no monumento sexan as idóneas, rebaixando a elevada humidade existente no interior da cámara e así manter un microclima adecuado no recinto da forma máis natural posible. Drenaxes profundas e superficiais, así como a disposición de lama de protección solar e mecanismos de regulación da ventilación natural, son sistemas que se contemplan para conseguilo, e para protexer as pinturas do túmulo". Edificio principal O edificio do centro de recepción exponse como o limiar de entrada ao recinto. Nel, situaranse: o control, a información, a exposición didáctica, aseos, almacén, etc; dispondo dunha superficie aproximada de 300 m2. O cerramento resólvese con fachadas ventiladas e revestimentos en lama de madeira. A fragmentación do seu volume axudará a manter unha escala adecuada e integrar o edificio na súa contorna. Este acollerá un espazo museístico para que os miles de visitantes que acudan poidan coñecer a cultura megalítica. Novas relacionadas Máis novas Fonte - Nota de prensa do Gabinete de Prensa da Deputación da Coruña.
|
Semente RSS