A visita do presidente da Xunta de Galicia a Vimianzo, para a inauguración do monumento ao Emigrante, era esperada por todos. Esperada non só polas palabras que podían rondar en torno as migracións, senón que moitos agardaban novas sobre as infraestruturas paralizadas do concello vimiancés.

Así, o "non anuncio de apertura" do xeriátrico e do parque empresarial é unha mala nova para o pobo vimiancés, segundo a oposición. Para o BNG "resulta difícil de entender que non fixeran ningunha referencia (...) cando foi motivo principal das promesas electorais do PP". O BNG lembra que o PP "se comprometeu en público a rebaixar o prezo das parcelas ata 35€ metro cadrado". Afonda así na incertidume o silencio da XUnta.

“Non está mal que o Sr. Feijoo veña inaugurar un monumento feito con cartos dos emigrantes”, di o portavoz municipal do BNG; “o que non está ben e que manteña pechados con máis de oito meses de atrasos o xeriátrico e o parque empresarial, non veña a inauguralos, e nin sequera teña nada que dicir ao respecto cando ven a Vimianzo”, di Manuel Antelo.

O BNG de Vimianzo lembra que hai pendente a execución dun acordo do Pleno para unha xuntanza cos responsables da Xunta en materia de atención aos maiores e de parques empresariais, para esixir a apertura do xeriátrico e o impulso ao parque empresarial, e pídenlle ao alcalde e ao PP a que contribúan a que se realicen canto antes estas reunións. “Cando o BNG estaba na Xunta houbo sempre unha disposición a falar destes asuntos, e dende o grupo municipal estivemos axilizando os contactos coa corporación”, di o portavoz nacionalista; “vexo máis preocupación en Borbujo por saír na foto que por traballar por Vimianzo”, engade o portavoz municipal. 

Novas relacionadas

• Vimianzo homenaxea a figura do Emigrante.
• O BNG de Vimianzo quere recuperar o río co Fondo Estatal.
• Vimianzo esixe a axilización da apertura do xeriátrico.
• O xeriátrico paciente.

Fonte

• Nota de prensa do BNG de Vimianzo.