O peche das oficinas costeiras, e en toda Galicia, do Instituto Social da Mariña, está creando certo malestar no sector. E esta semana o BNG, a través do seu portavoz no Congreso dos Deputados, Francisco Jorquera, vai levar a voz do sector ao Parlamento. Presentará unha iniciativa na que denuncia o peches das oficinas en diversas localidades costeiras de Galiza.

En concreto, lembra que a entidade dependente da Secretaría Xeral da Seguridade Social pechou o pasado 26 de novembro a oficina de Muxía e agora está previsto tamén o peche das de Fisterra e Laxe.  

"Servizo fundamental"

Francisco Jorquera demanda que se manteña a prestación de servizos “porque é fundamental para o mantemento da actividade pesqueira en moitas vilas galegas” . Jorquera considera “cando menos, discutíbel” a xustificación do ISM de que hai unha caída no número de traballadores do mar, de que hai poucos funcionarios e polo tanto hai que centralizar e racionalizar a actividade.  

Neste sentido, o deputado do BNG subliña que “non negamos o feito de que houbo unha redución no número de traballadores do mar e de que hai algunhas sedes do ISM que poderían ser tamén aproveitadas para instalacións sociais e sanitarias”.  

Sen embargo, considera que “tamén é certo que non se debe suprimir un servizo vital para o mantemento da actividade pesqueira, xa que as oficinas do ISM tramitan baixas, altas, xestionan o pagamento das pensións...etc.”.  

Alternativas

Por iso, Francisco Jorquera demándalle ao Goberno que manteña o servizo mediante outras alternativas, como é a prestación do mesmo durante determinados días da semana en cada localidade.  

O deputado do BNG lémbralle ao Goberno “que a supresión do servizo agravaría a xa precaria situación dos traballadores do mar, cos problemas de desprazamento a través dunhas comunicacións precarias que terían que padecer para realizaren xestións imprescindíbeis para o seu traballo”.  

Máis información

• Seg-social.es: ¿Qué es el Instituto Social de la Marina?.

Novas relacionadas

• Hoxe ponse en vigor a nova lei de pesca.
• Xa se poden ver na rede "Os Soños do mar".
• Un repaso sustentable á ría de Corcubión.
• 12 toneladas menos e un novo exemplo de sustentabilidade no mar.
• Entrevista co Patrón Maior de Lira sobre a súa participación no foro de Bruxelas: "Na Reserva Mariña estamos notando un 80% de aumento da produción de percebe".
• Valoración e alternativas de futuro para a situación actual da pesca de baixura.
• Memoria de 3 anos de traballo en prol do sector pesqueiro.
• A Asoar-Armega repasa a caída do sector pesqueiro de artes menores.

Fonte

• Nota de prensa do BNG comarcal.