Se xa é típico que os nenos e nenas da Costa da Morte se convirtan nos verdadeiros protagonistas dos beléns viventes organizados por concellos e colectivos socioculturais, nesta ocasión na parroquia de Cerqueda non só se quixo facer entrega de ofrendas ó neno Xesús, senón que ademais se artellou un Mercado de Belén para converter a presente nunha cita atractiva a todos os públicos. Detrás da iniciativa, por suposto, a AC Raigañas de Cerqueda, que preparou un Nadal para cativos en Cerqueda.

Durante semanas atrás a rapazada da parroquia estivo a elaborar unha ampla variedade de produtos: trufas, flores, pulseiras, colares, carros de vimbio, tarros de cores. Todo se puxo á venda e todo desapareceu dos seus postos. Mesmo por alí andaba o libro que Xosé Manuel Varela Varela escribiu ao regueifeiro Celestrino, que encontrou algún lector que o mercou para ler nestas datas de Nadal. Tampouco faltaron os pinchos de tortilla que se podían acompañar de viño ou cervexa do país, isto xa para os pais e avós.

Con este Mercado de Belén os máis novos de Cerqueda demostraron o seu espírito emprendedor nunhas datas nas que a crise económica pecha moitas empresas. Recadáronse uns 150 euros que os rapaces investirán nunha merenda de Nadal en vindeiros días. Sen lugar a dúbidas, unha moi amizable maneira de compartir estes días sen escola.

Reis Magos

As festas de Nadal continúan na parroquia de Cerqueda coa cita dos Reis Magos. Nesta ocasión, non se realizará o percorrido polos lugares da parroquia; non obstante, os Reis acudirán á misa e, nunha carpa que se volverá a instalar no adro da igrexa, farán entrega de agasallos e realizarán o tradicional reparto de caramelos. A novidade da comitiva dos Reis este ano en Cerqueda será que acudirán a unha festa infantil que organiza o restaurante Aldeola. Tras departir cos nenos asistentes á festa, regresarán de novo a oriente.

Nas fotos vemos a María Moscoso, Ana Pose, Icía Varela e Laura Reigía venderon libros e carros. Entre os libros, cabe destacar o libro que Xosé Manuel Varela Varela escribiu sobre Celestrino.

E claro, tampouco faltou Papa Noel...

Novas relacionadas

• Un libro a Celestrino.
• Cerqueda e o Couto celebraron a gran festa da lingua retranqueira.
• O Apalpador achégase á Costa.
• Un Nadal para cativos en Cerqueda.

Fonte

• Nota de prensa da Asociación Cultural Raigañas, da man de María Begoña Gómez Otero.