|
Para pechar o ano, nova confrontación total entre PP e PSOE. E de novo, arredor do Parador parado, como vimos comentando nos últimos días. O entorno da fermosa praia de Lourido (na foto) segue virxe, e mentres as acusacións e ata os insultos dan boa conta da falta de diálogo entre os dous partidos. I é que as posicións son radicalmente contrarias e o único perxudicado, de novo, é o pobo da Costa da Morte. Ambas cúpulas comarcais reuníanse onte na zona para poñer a súa posición na voz pública. Deste xeito, o parador xa non levará, en principio, o selo Penela, e terá que desenvolver de novo todo o proceso de licitación. Uns apuntan que se poderá facer en 6 meses o que levou 2 anos, e os máis pesimistas apuntan outros tantos para volver a onde estamos. Pero quen vai facer o Concurso? O Goberno estatal Antón Louro, delegado do Gobierno en Galicia, arremetu estes días con contundencia contra o goberno da Xunta. "O Concello de Muxía comprometeuse a adquirir os terreos e a polos a disposición do Estado e fíxoo; a Xunta comprometeuse a pór a disposición de Turespaña os proxectos básicos e de execución e aínda non o fixo", afirmou cargando contra a nova Xunta, por non entregar o resultado do Concurso de Ideas. Así e todo, afirmou que é posible que Turespaña asuma todos os trámites para axilizar o proxecto. O PSOE comarcal: "A Xunta paraliza e bloquea o emprego" Convocou unha reunión de alcaldes o rexedor muxián Felix Porto, á que só acodiron os da súa cor e mais José Manuel Traba, alcalde popular de Fisterra. Ademais, a Coordinadora Comarcal do PSOE reuníase en Muxía. A conclusión da xuntanza, a "acusación ao goberno de Feijóo de paralizar e bloquear actuacións xeradoras de emprego na Costa da Morte". Continuando co cruce de declaracións con grandes insultos e poucos argumentos (algo no que reinciden unha e outra vez os 3 partidos do país), o PSOE volve coas acusacións á "volta á república bananeira". É máis, chegan a falar de "miseria política e intelectual". Con respecto o Parador de Muxía, o grupo afirma que "existe un concurso público, acordado entre dúas administracións lexítimas; existe concorrencia competitiva entre distintos profesionais sen que o concurso fose obxecto de ningún recurso nin reclamación; existe un xurado; existe unha consignación orzamentaria para a redacción do proxecto técnico nas contas de 2009". Para o PSOE, a paralización só se debe a "subterfuxios e pretextos" do goberno, que demostran "a súa incompetencia e a súa inacción". O PP: "A Xunta non parou ningún proxecto" Representantes do PP comarcal, comandados polo Secretario Xeral do PP Provincial, Diego Calvo, reuníronse en Vimianzo para tratar o tema. A resposta do PP é a de acusar "ao Bipartito de paralizar a obra e de mentir ao afirmar que existía un convenio asinado para que a Xunta asumise o custo do proxecto". Calvo apelou á "falta de responsabilidade" do Goberno Bipartito, e se aferra ao informe da avogacía do estado, que apunta carencias publicitarias na execución do Concurso de Ideas. "Chapuzas e irregularidades" son as palabras que utiliza o PP para definir a política do PSOE, demostrando tamén un uso curioso da linguaxe política. De igual xeito, criticaron a "doble moral" do mesmo Louro por "confundir á Costa da Morte". De tódolos xeitos, Calvo subliñou a "total disposición da Xunta para que o Parador sexa unha realidade". Por iso, Calvo instou a todas as partes a sentarse e a buscar unha solución "desde o diálogo e o consenso". A ver se é certo e ambos grupos se deixan de acusar ao contrario con tramas que non levan a nigures e tratan de buscar unha solución. Novas relacionadas Fonte
|
Semente RSS