O Noitebús xa se converteu nun elemento fundamental no lecer de moitos mozos e mozas da Costa cada fin de semana. A posibilidade de desprazarse aos lugares de marcha deixando o coche na casa e a un prezo baixo, atrae cada noite de festa a boa parte da mocidade da bisbarra.

Pero o que a priori é un servizo moi útil e necesario, pode rematar por desaparecer, como aconteceu en Laxe. A ruta de Noitebús que percorre o norte da Costa, polos concellos de Malpica, Cabana e Laxe, ata chegar a Ponteceso, eliminou do seu traxecto a finais do pasado ano a súa parada en Laxe logo de varias noites de altercados.

Os condutores da liña, pertencentes á Compañía Metropolitana de Transportes, denunciaron unha serie de actos vandálicos por parte de varios usuarios con subida e baixada en Laxe. Segundo apuntan, a viaxe de volta á Laxe, ás 06:00h da mañá era moi desagradable, pois a combinación de vandalismo e ebridade, provocaba que algúns suxeitos abandonaran o autobús convertido nunha desfeita. A empresa denuncia que hai quen ó remate da viaxe deixaba dentro do vehículo restos do botellón, como vasos ou botellas rotos, e mesmo quen vomitaba ou ouriñaba. Tamén apuntan desperfectos en apoiacabezas, tapicería e luces individuais ou mesmo sustracción de fundas.

Ante esta perspectiva os responsables do servizo optaron por eliminar do percorrido a parada en Laxe. Deste xeito, a mocidade laxense vése na obriga de recurrir ó coche particular ou ó taxi para achegarse nas noites de marcha ata Ponteceso. Non obstante, hai quen recurre ao autostop.

Recuperando o servizo

Hai quen queda sen Noitebús pero tamén hai quen quere recuperalo. É o caso da vila de Cee. A pasada semana un grupo de hostaleiros da vila da Xunqueira mativeron unha reunión co alcalde, Ramón Vigo, para demandarlle o servizo de Noitebús para a localidade coa intención de que Cee rexurda en clave de festa nocturna. Piden os hostaleiros unha ruta que parta de Muros e outra dende Camariñas, con chegada a Cee. O alcalde aseguroulles ós hostaleiros que vai trasladar a petición á Xunta, pero non hai que esquecer que Cee quedou sen Noitebús no seu día por falla de usuarios.

Máis información

• Todas as liñas de Noitebús da Costa da Morte.

Novas relacionadas

• Axuda misericordiosa para a única estación de buses da Costa da Morte.
• Volve o peixe á lonxa de Laxe.
• Nace a Plataforma pola Cofradía de Laxe Libre.

Fonte

• Redacción de Fran Lago para QPC.