|
Unha vez que semella imposible de recuperar o Parque Empresarial de Vimianzo, o BNG leva o de Cee ao Congreso dos Deputados de Madrid para pedir o abaratamento das parcelas. Fundamental que o prezo estea acorde coa bisbarra e que non sexa un dos solos máis caros do estado, como ocorre co vimiancés ou en Malpica. Foi o portavoz do BNG no Congreso dos Deputados, Francisco Jorquera, o que presentou unha iniciativa na que lle esixe ao Goberno que “o prezo das parcelas do parque empresarial de Cee sexa razoábel e asequible para os empresarios da zona”. Francisco Jorquera subliña que “é necesario un prezo que incentive o desenvolvemento económico da Costa da Morte”. Titularidade púbica Jorquera lembra que o polígono empresarial está promovido pola sociedade Suelo Empresarial del Atlántico (SEA), constituída a raíz da catástrofe do Prestige, e na que o Goberno central é o accionista maioritario (o 85% pertence á SEPI), mentres que a Xunta de Galiza participa cun 15%. O deputado do BNG lembra que o 23 de febreiro de 2004 a SEA presentou publicamente os novos parques empresariais que prevía construír en Galiza. Entre eles figuraba o de Cee, que con 190.000 metros cadrados, estaba previsto que se finalizase “no ano 2005, ou ben en 2006”. “A realidade –subliña- é que o parque empresarial de Cee non foi aprobado polo Consello da Xunta de Galiza até o 22 de novembro de 2007, cando entrou na Xunta o Goberno Bipartito”. “A redución na oferta da construtora debería repercutir no prezo das parcelas” Finalmente as obras comezaron en decembro de 2008 e concluíron a comezos do presente ano, estando pendente xa só de ser inaugurado. A empresa adxudicataria das obras reduciu a súa oferta no presuposto previsto de 5,7 millóns a algo máis de 3,8 millóns de euros, o que, segundo o deputado do BNG “debería repercutir tamén no prezo das parcelas”. A superficie finalmente urbanizada ascendeu a 228.000 metros cadrados. Novas relacionadas Fonte 
|
Semente RSS