A mocidade do IES de Ponteceso será a verdadeira protagonista na próxima celebración do 175 aniversario do nacemento do bardo Eduardo Pondal. Durante a mañá do vindeiro luns, eles serán os principais culpables para que toda a sociedade galega non esqueza que un 8 de febreiro de 1835 un neno chamado Eduardo María naceu na “pequena Ponteceso” e que se bautizaría dous días máis tarde na igrexa parroquial de San Tirso de Cospindo (na imaxe). 

Esta proposta na que participan xurdiu da colaboración entre o Equipo de Normalización  e Dinamización Lingüística do IES de Ponteceso que coordina Eva Mª García Reino e a Fundación Eduardo Pondal. Amais dos alumnos, na súa programación participarán tamén dous dos membros do patronato da Fundación Eduardo Pondal: Luís Giadás e José María Varela. O párroco de Cospindo, José Manuel Varela, e un familiar do propio poeta colaborarán tamén nalgunha das sesións.  

A presente inicitiva de lembranza do nacemento de Pondal terá como motivo esencial realizar un percorrido polo territorio máis íntimo da súa nenez: aquel que o conduciu desde a súa casa natal ata a pía bautismal. Os versos, a historia local, a música de gaita e violín, os espazos que andou o poeta pola súa morada, a paisaxe poética, o himno galego, varias ofrendas florais e a presenza de Pondal nas novas tecnoloxías enriquecerán este paseo pedagóxico matutino do alumnado asistente. 

Programa

Novas relacionadas

• Cando Ronca o vendabal: Lembrando a Eduardo Pondal.
• Cando Ronca o vendabal: A esquecida memoria de López Abente.
• Pondal tamén aprende de redes sociais.
• Ponteceso, "vila literaria".

Máis novas

• I Carnival Music Meeting in Corcubión.
• A Costa tamén escoita ás 55 mentiras sobre o galego.

Fonte

• Nota de prensa da Fundación Eduardo Pondal, da man de Xosé Manuel Varela.
• Fotografía de Ponteceso.net.