Interesante temática a que trataban este xoves, 4 de febreiro de 2010, no programa O Ronsel de Radio Roncudo e radiONeria. Xa saben que Óscar Rey voltou ás ondas logo dun ano de silencio con todo un mosaico semanal de informacións, entrevistas e opinións nun ton próximo e desenfadado.

Sempre conectado

Pois ben, na terceira edición desta nova etapa, un dos temas a tratar foi a relación entre os maiores e a aprendizaxe no eido das novas tecnoloxías. E para elo achegouse ata os micrófonos das radios o cormelán Suso de Basilio. Suso, que está a piques de cumprir 66 anos, é a viva imaxe de que as novas tecnoloxías non teñen porqué ser incompatibles cos máis veteranos, de tal xeito que el mesmo decidiu adentrarse nos terreos da blogosfera onde podemos atopar a súa bitácora (susodebasilio.blogspot.com), na que plasma as súas vivencias e os seus pensamentos.

É tal o descubrimento que a rede pode supoñer para os nosos maiores, que o propio Suso recoñecía que “se teño que elixir quedo sen o coche pero non quedo sen isto”. Unha aposta a de potenciar as novas tecnoloxías entre os nosos maiores, que aínda ten unha longa vida por percorrer.

Falando de maiores e bitácoras na rede achégasenos á mente a lembranza da que ben seguro foi a precursora na utilización das novas tecnoloxías entre os nosos avós, a muxiana María Amelia López, que o pasado 2009 deixaba orfo o seu a mis 95 años (amis95.blogspot.com) logo de tres anos de historias e milleiros de seguidores a través da rede.

Aquí abaixo vemos precisamente unha das clases de informática para adultos nas que aprendeu o bo de Suso, e que ademais son, en boa medida, impartidas polo propio Oscar Rey, que vemos de pé na imaxe.  

En galego

Pero se nunca é tarde para aprender sobre as novas tecnoloxías, tampouco é para coñecer en profundidade unha lingua e máis se se trata nosa. I é que Suso de Basilio amosaba en O Ronsel a súa ledicia polo seu último logro, o diploma do Celga 4. Trátase dun certificado oficial que acredita nunha persoa un grao de coñecemento da lingua galega equivalente ao requerido en Bacharelato. Apuntaba o cormelán con tintes satisfactorios o esforzo que tivo que realizar ao asistir a diversos cursos, xunto coa dificultade engadida de moitas variacións na normativa da lingua, pero ao final pagou a pena.

Casos como o de Suso son o claro exemplo de que a idade non é un inconveniente para seguir aprendendo e achegarse a un mundo tan descoñecido como o das novas tecnoloxías. Como se apuntaba no programa, é cada vez máis frecuente este achegamento grazas ás actividades de aprendizaxe de cara á xente maior que organizan os distintos concellos e asociacións da Costa. Iso si, sen esforzo, está claro que nada se acada.

Máis información

• susodebasilio.blogspot.com.

Horario do Ronsel

• Os xoves, de 22:00h a 00:00h en directo.
• Os sábados, de 12:00h a 14:00h en diferido.
• Frecuencias:
  - Radio Roncudo (106.1FM nas Terras de Bergantiños).
  - radiONeria (107.8FM na comarca de Fisterra e Carnota).

Novas da radiONeria

• A alma da música en Corme.
• A bitácora da semana (XXXV): O blog de Suso de Basilio.
• Elección Histórica: Suso de Basilio elixe aos persoeiros de Ponteceso.
• Ata sempre María Amelia.

Máis novas

• Volve o Ronsel para guiar á radiONeria e Radio Roncudo.
• O Peche, con Fran Lago.
• O Boletín diario da Radio Neria.

Máis información

• Blog da radiONeria.
• Páxina da Radio Roncudo.

Fonte

• Redacción de Fran Lago para QPC ( Este enderezo de correo-e está protexido contra spam bots, necesitas ter o Javascript activado para podelo ver ).
• Programa O Ronsel, da Radio Roncudo.