Vemos con gusto e ilusión como se move o concello de Muxía para comezar a explotar as súas potencialidades literarias. Xa vimos como comezan os traballos para crear a Fundación López Abente, pero as iniciativas non fican aí.

O Concello adiantábase ás espectativas, e o pasado outubro enviaba unha carta ao Conselleiro de Cultura e Turismo, Roberto Varela, interesándose por participar no proxecto de turismo cultural "Vilas Literarias". Un proxecto do que xa forma parte Ponteceso (onde a Fundación celebra hoxe o 175 aniversario do bardo pontecesán) e no que por Cataluña xa se está desenvolvendo con grande éxito.

Parámetros

A elección das vilas levarase a cabo de acordo con profesionais do sector e as aspirantes deberán cumprir unha serie de requisitos, como que a súa poboación teña configuración urbana e recoñecemento de vila, que sexa lugar de nacemento dun escritor recoñecido da literatura galega ou ao que se lle dedicou o Día das Letras Galegas. Tamén se valorará que conte cunha ruta xa recoñecida.

Ruta Abentiana

No Concello de Muxía levábase xa un tempo traballando nun proxecto para a difusión da obra de López Abente. A idea englobaba o que sería unha "ruta abentiana" pola vila e a partir de aí o concello pensou nos beneficios que reportarían incluirse no proxecto de Vilas Literarias. Na imaxe vemos a súa casa.

Proceso de adhesión de Muxía

Foi o pasado 14 de outubro de 2009 cando o alcalde muxián enviaba unha carta ao Conselleiro de Cultura interesandose polo proxecto Dende a Consellería de Cultura, o Director Xeral, Francisco López respondeu remitindo ao concello muxián á Fundación Curros Enriquez, concretamente ao seu secretario, Antonio Piñeiro, xa que desta Fundación partira a proposta do Proxecto Vilas Literarias.

Coa axuda de Piñeiro, o concello muxián cubriu os requisitos que debería cumplir a vila para adherirse ao Proxecto Vilas Literarias. Así, e xa en xaneiro deste ano, Porto enviaba unha nova carta dirixida a Francisco López na que se expoñían os motivos polos que a nosa vila cumpriría os requisitos e solicitando que Muxía fora incluida no proxecto Vilas Literarias.

Actualmente o concello está á espera da resposta do Sr. Francisco López para saber en que momento se atopa o Proxecto, sendo conscientes de que é un proxecto aínda en fase de consolidación, e que pasos debemos seguir para que Muxía poida, oficialmente, ser recoñecida como Vila Literaria.

Máis información

• López Abente na Elección Histórica da Costa da Morte.

Novas relacionadas

• Muxía intenta recuperar a memoria de López Abente cunha Fundación.
• Cando ronca o vendabal: A esquecida memoria de López Abente.
• Ponteceso, "vila literaria".
• A mocidade do IES de Ponteceso celebrará o 175 aniversario do nacemento de Eduardo Pondal .
• Unha de turismo en verso por Cataluña.

Fonte

• Redacción de QPC ( Este enderezo de correo-e está protexido contra spam bots, necesitas ter o Javascript activado para podelo ver ).
• Concello de Muxía.