Unhas semanas logo da matanza de máis de 1.500 escalos e troitas no encoro da Fervenza, as responsabilidades aínda non están claras. A empresa que controla os 4 encoros e explota as 8 centrais hidroeléctricas no curso do río Xallas, Ferroatlántica, está acusada por Medio Ambiente de cometer dúas faltas graves: unha pola xestión das augas do encoro e outra contra a fauna do río. A Xunta non se libra e tamén é sinalada pola Asociación pola Defensa Ecolóxica de Galicia (Adega) como culpable por ter concedido o control dos encoros á empresa de Villar Mir, alén de terlle concedido o control e explotación de 3 novos encoros.

Medio Ambiente argumenta que a lei non lle permitía realizar ningunha operación de control sobre a empresa (e se isto é realmente certo, significa que Ferroatlántica pode facer directamente o que lle pareza?) e a empresa asegura que non realizou ningunha apertura de portas nas semanas anteriores á desfeita, e que non son verdade os rumores que apuntan que a empresa quería secar o encoro para realizar obras no fondo do mesmo. Vamos que aquí ninguén ten a culpa.

Xa se alzan as primeiras voces que piden a retirada da concesión do control dos encoros á empresa de Villar Mir, como Marisol Soneira, deputada socialista e secretaria do PSOE para a costa atlántica ou a Federación Galega de Pesca, que tamén aconsella impoñer alo menos 2 anos de veda para recuperar a saúde da fauna do río.

Asi que agora sumerxirémonos en anos de papeis no Xulgado de Corcubión, entre cruces de declaracións dos uns e dos outros tentando escabullirse de cadansúas responsabilidades. Entrementres a desfeita xa está feita, pero polo menos, a choiva xa chegou.

Novas relacionadas

• 20-11-07: Non son poucas as voces que piden a retirada da concesión dos encoros a Ferroatlántica.
• 19-11-07: A Xunta alega que nada puido facer para salvar aos peixes pero que sancionará a Ferroatlántica.
• 13-11-07: Medio Ambiente descarta a sequía e culpa a Ferroatlántica da morte de milleiros de peixes.
• 12-11-07: Ferroatlántica está a ser investigada pola desfeita ecolóxica.
• 3-10-07: Ferroatlántica se desmarca das acusacións de contaminación por metais pesados.

Fonte

• Artigo de Ubaldo Cerqueiro García, redactor xefe de Que pasa na Costa para o semanario O Acontecer.